2022 онд дотоодын нийт бүтээгдэхүүн 4.8 хувиар өссөнийг Үндэсний статистикийн хороо мэдээллээ. Өсөлтөд хөдөө аж ахуй, үйлчилгээ, бүтээгдэхүүний цэвэр татвар өссөн нь гол нөлөө үзүүлсэн бол уул уурхай, олборлолтын салбар 11.9 хувиар буурсан байна.

Энэхүү бууралт нь төмрийн хүдэр, хүдрийн баяжмал 26.9 хувиар, газрын тосны олборлолт 45 хувиар буурсантай холбоотой гэж Үндэсний статистикийн хороо тайландаа онцоллоо.

Үйлчилгээний салбарын хувьд 5.5 хувиар өсөхөд бөөний болон жижиглэн худалдааны салбарын нэмэгдэл өртөг найман хувиар, мэдээлэл холбооны салбарын нэмэгдэл өртөг 6.9 хувиар өссөнөөр нийт өсөлтийг дээш татсан байна.

Дотоодын нийт бүтээгдэхүүнийг эцсийн ашиглалтын аргаар тооцоход 51.6 хувь нь өрхийн хэрэглээ, 13.7 хувь нь Төрийн байгууллагын хэрэглээ, 40.2 хувь нь хөрөнгийн нийт хуримтлал бүрдүүлсэн байна. Эдгээрийг өмнөх онтой харьцуулахад айл, өрх болон Төрийн байгууллагын хэрэглээ өсжээ. Мөн хөрөнгийн нийт хуримтлал 4.4 хувиар өссөн байна.