Мөнгөний нийлүүлэлт есдүгээр сарын эцсийн байдлаар 33 их наяд төгрөг давж, өмнөх оны мөн үеэс 20.9 хувиар өссөн байна. Жилийн хугацааны өөрчлөлтийг харвал төгрөг, валютын харилцах болон төгрөгийн хадгаламж тус бүр өссөнтэй холбоотой байна. Харин нэг сарын хугацааны өөрчлөлтийн хувьд валютын хадгаламж, гүйлгээнд гаргасан бэлэн мөнгөний хэмжээ тус тус 1.2-1.7 хувиар буурчээ.

Мөнгөний нийлүүлэлтийг активын байршуулалт талаас авч үзэхэд гадаад цэвэр активын өсөлт гол өсөлтийг бий болгосон бол дотоод цэвэр активын нийт дүнд эзлэх хувь өмнөх сараас үл ялиг буурсан байна.

Нийт мөнгөний нийлүүлэлтийн дүнд эзлэх гүйлгээнд гаргасан бэлэн мөнгөний хэмжээ 3.2 хувийг бүрдүүлж байгаа бол төгрөг болон валютын харилцах дансны үлдэгдэл 37.4 хувийг бүрдүүлжээ Энэ нь өмнөх оны мөн үетэй харьцуулахад харилцах дансны нийт дүнд эзлэх хэмжээ гурав орчим хувиар нэмэгдсэн үзүүлэлт болж байна.

Монголбанкны Мөнгөний бодлогын хороо сүүлийн найман удаагийн хурлаар бодлогын хүүг зургаан хувиас нэмэгдүүлсээр 13 хувьд хүргэсэн юм. Мөнгөний хатуу бодлого 2024 онд ч үргэлжлэхээр байгааг Төв банкны Ерөнхийлөгч мэдэгдэж байв. Ингэснээр инфляцыг эрэлт талаас нь хязгаарлаж байгаа ч төсвийн тэлэлт анхаарал татсан асуудал хэвээр байна.

Аравдугаар сарын 16-ны өдрийн байдлаар Төв банкны үнэт цаасны үлдэгдэл 6.5 их наяд төгрөг давснаас 5.6 их наяд нь богино хугацаат буюу дөрвөн долоо хоногтой үнэт цаасанд байршуулсан байна.