“Warner Bros. Discovery” компани дэлхийн хамгийн алдартай зохиолуудын нэг “Харри Поттер”-оос сэдэвлэсэн дэлгэцийн цуврал уран бүтээл гаргахаар тохиролцоонд хүрэхэд тун дөхөөд байгааг ойрын эх сурвалж “Bloomberg”-т мэдээлжээ. Тодруулбал: Ж.К.Роулинг нэрийн доор бүтээлээ туурвидаг Жоанна Роулингийн бүтээл “Харри Поттер”-ийн долоон номын боть тус бүр нь дээрх цуврал киноны нэг улирал болохыг мөн мэдээлсэн байна. 

Энэхүү цуврал нь “HBO”-ийн толгой компани “Warner Bros”-ийн ирэх долоо хоногт зарлах стриминг үйлчилгээний шинэ стратегийнх нь салшгүй нэг хэсэг болох төлөвтэй байна. Тус компанийн Гүйцэтгэх захирал Дэвид Заслав, “HBO”-ийн Гүйцэтгэх захирал Кэйси Блойс нар шинэ цуврал бүтээхээр Ж.К.Роулингтай ярилцсан ч хараахан тохиролцоонд хүрээгүйг өмнө нь мэдээлж байв.

Бүх цаг үеийн борлуулалтаараа дэлхийд тэргүүлэгчдийн нэг болох “Харри Поттер”-ийг бүрэн хэмжээний найман кино болгон амилуулж чадсан “Warner Bros”-ийн хувьд тус зохиолыг ашиглан цаашид илүү ихийг хийх хүсэлтэй нь нууц биш. Харин Роулингийн хувьд зохиолоос нь сэдэвлэн тайзны жүжиг тавих, соёл амралтын парк байгуулах эрхийг өгсөн ч шинэ кино болон телевизийн цуврал бүтээх тохиролцоо хийгээгүй хэвээр байна. 

Эх сурвалжийн дурдсанаар зохиолч энэхүү цувралын үйл явдал, санааг эх зохиолоос гажихгүйгээр буулгахад хамтарч ажиллах ч кино бүтээх өдөр тутмын үйл явцад оролцохгүй аж.