Гаалийн ерөнхий газрын мэдээллээр оны эхний 11 сард Монгол Улсын экспортолсон нүүрсний хэмжээ 27.1 сая тонн болж, өмнөх оны мөн үеэс 78.7 хувиар өслөө. Харин 2018 болон 2019 онтой харьцуулахад 22 хүртэлх хувиар буурчээ.

Тайлант хугацаанд нүүрсний экспортын орлого 5.7 тэрбум ам.доллар болж, өмнөх оны мөн үеэс 120 хувиар өссөн байна. Мөн биет хэмжээний хувьд өсөлттэй байсан 2019 оны үетэй харьцуулахад 94.9 хувиар өсжээ. Нүүрсний экспортын биет хэмжээ төлөвлөсөн хэмжээнээс 50 гаруй хувийн давуу гүйцэтгэлтэй явж байна.

Экспортын хоёр дахь гол бүтээгдэхүүн болох зэсийн баяжмал 1.29 сая тонн буюу бараг 1.3 сая тонн хүрчээ. Энэ нь өмнөх оны мөн үеэс 2.7 хувиар өссөн үзүүлэлт болж байна. Харин экспортын гүйцэтгэл нь 6.9 хувиар давжээ.

Түүнчлэн төмрийн хүдэр болон боловсруулаагүй газрын тосны экспорт 38.1 болон 50.1 хувиар тус тус буурсан байна.