“Улаан овоо” нүүрсний уурхайд олборлолт хийдэг “Silver Elephant” компани 2022 оны санхүүгийн тайлангаа танилцууллаа. Тус компани тайлант хугацаанд 6.9 сая канад долларын алдагдалтай ажилласан байна. Алдагдал нь өмнөх оноос 1.9 хувиар өсжээ.
“Silver Elephant” компани “Улаан овоо” нүүрсний уурхайг Монгол дахь охин компаниараа дамжуулан 100 хувь эзэмшдэг. “Silver Elephant”-ийн охин компани “Mega Thermal Coal” компани “Улаан овоо”, Чандгана эрчим хүчний нүүрсний уурхайнуудын үйл ажиллагааг хариуцдаг.
Өнгөрсөн онд “Улаан овоо” нүүрсний уурхайгаас 15 мянган тонн нүүрс нийлүүлэх гэрээг Хонгконгийн компанитай байгуулсан байна. 12 дугаар сарын байдлаар 3166 тонныг нь нийлүүлжээ. Одоогийн байдлаар тус уурхайд 85 мянган тонн нүүрсний овоолго байгааг мэдээлсэн юм.
“Silver Elephant” компани Монголоос гадна АНУ, Канад, Боливи зэрэг улсад үйл ажиллагаа явуулж байна.
