Байгалийн хийн салбарт тэргүүлэгч ОХУ-ын “Gazprom” компанийн ашиг оны эхний хагас жилд 3.1 тэрбум ам.доллар болж, 2020 оноос хойших доод түвшинд хүрсэн байна. Өмнөх оны эхний хагаст тус компани 26 тэрбум ам.долларын цэвэр ашигтай ажиллаж байсан бол энэ оны эхний хагаст ашиг нь 3.1 тэрбум болж буурсныг тус компани тайлагнажээ. Үүнд “Gazprom” компанийн Европ руу хийх нийлүүлэлт огцом буурсан нь нөлөөлсөн байна.

Түүнчлэн энэ оны II улиралд тус компани 194 сая ам.долларын алдагдалтай ажиллажээ. Одоогоор “Gazprom”-ийн Европт нийлүүлдэг  байгалийн хийн гол хоолойнууд зогсонги байдалд ороод байгаа аж.

Энэ онд тус компани БНХАУ руу 22 тэрбум куб метр байгалийн хий экспортлохоор төлөвлөсөн  нь өмнө оныхоос 6.5 тэрбумаар илүү дүн болж байна.