Харин дулааны эрчим хүчний салбар цахилгаанаас хүнд буюу энэ өвөл Улаанбаатар хотод 50 хувийн хэт ачаалал үүсэх тооцоотой байна.

Өвлийн их ачааллын үед цахилгааны эрэлт 6-7 хувиар өсөхөд гадаад, дотоодын эх үүсвэрээр бүрэн хангах боломжтой гэж үзэж байгаа аж. Хэдий тийм боловч тоног, төхөөрөмжийн саатал үүсэхэд цахилгаан тасрах эрсдэл нүүрлээд байна.

Өнгөрсөн онд дулааны эрчим хүч 40 хувийн хэт ачаалалтай байжээ. Энэ онд нэмэлт хэрэглэгчид дулааны сүлжээнд холбогдвол хэт ачаалал 50 орчим хувьд хүрэх тооцоотой байна. Нэг тодорхой гарц бол шинэ эх үүсвэр хэдий ч ойрын ирээдүйд шинэ эх үүсвэр ашиглалтад орохооргүй байгаа юм. Тиймээс хэмнэлт хийхээс өөр аргагүй болж байгаа аж.

Засгийн газраас цар тахлын нөхцөл байдлыг харгалзан иргэд, аж ахуйн нэгжүүдийг цахилгааны төлбөрөөс чөлөөлж байсан бөгөөд үүнд 600 гаруй тэрбум төгрөг зарцуулагдаж байсан юм.