Цахилгаан автомашин үйлдвэрлэгч “Tesla Motor”-ийн шинэ загвар "Model 3"-ийг танилцуулах арга хэмжээ шинэ “iPhone”-ийн танилцуулгаас дутахааргүй хөл хөгжөөнтэй болж өнгөрлөө. Тус компанийн зах зээлд гаргах гэж буй хамгийн хямд машин “Model 3”-ийн урьдчилсан захиалга хоёр өдрийн дотор 276 мянгад хүрсэн байна. Гэхдээ захиалга өгөхийн тулд 1000 ам.долларын урьдчилгаа төлж байгаа захиалагчид ирэх оны сүүлээр л автомашинаа хүлээн авах боломжтой ажээ. Захиалгын хэмжээ их байгаа учир үйлдвэрлэлийн явцыг хурдасгах хэрэгтэй гэж “Tesla”-ийн Гүйцэтгэх захирал Илон Маск жиргэсэн байна. “Tesla Motor”-ийн тэргүүн зах зээлд АНУ-д автомашины борлуулалтын хэмжээ тааруу байгаа ч энэхүү мэдээллийн дараа хувьцааны ханш нь 3.4 хувиар өсч, зах зээлийн үнэлгээ нь 31.4 тэрбум ам.долларт хүрсэн байна. Өмнөх загварууд болох “Model X” болон “Model S”-тэй харьцуулахад дор хаяж хоёр дахин хямд үнээр буюу 35 мянган ам.доллараар худалдаанд гарах “Model 3” загварын автомашиныг нэг удаа бүрэн цэнэглээд, 346 километр зам туулах боломжтой юм байна. “Tesla Motor” жилийн дотор 500 мянган машин үйлдвэрлэх боломжтой үйлдвэрийг ашиглалтад оруулахаар ажиллаж байгаа бөгөөд тус компани жилд 200 мянга гаруй цахилгаан автомашин зах зээлд нийлүүлж чадах юм бол АНУ-ын Засгийн газар машин тус бүрт 7500 ам.долларын татаас өгөх ажээ. Хэрэв одоогоор захиалга өгсөн хүмүүс бүгд “Model 3”-ийг худалдаж авах юм бол “Tesla” АНУ-ын Засгийн газраас хоёр тэрбум ам.долларын татаас авна гэсэн үг юм.

Г.Ану

Холбоо барих: anu.g@bloombergtvmongolia.com

minjma.g@bloombergtvmongolia.com