“Mongolian Mining Corporation"-ийн хөрөнгө оруулагчдын нэмэлт хувьцаа авах саналын хугацаа дууссан байна. Мөн тус компанийн зүгээс “Таван Толгой"-ийн хөрөнгө оруулагчийг сонгох тендерт ялалт байгуулсан талаар мэдээллээ. Сар гаруйн хугацаанд “Mongolian Mining Corporation"-ийн санал болгосноос нь 3.4 дахин их хэмжээний хувьцаа худалдан авах хүсэлт ирсэн байна. Өөрөөр хэлбэл тус компанийн зүгээс 1.5 тэрбум хонгконг долларын үнэ бүхий 5.6 тэрбум ширхэг хувьцаа гаргахаар төлөвлөсөн ч 19 тэрбум ширхэг хувьцааны санал иржээ. Ирэх даваа гарагаас хувьцаануудыг олгож дараах өдрөөс нь Хонгконгийн Хөрөнгийн биржээр арилжаалах боломж бүрдэх юм. “Mongolian Mining Corporation"-ийн хөрөнгө босгох зардал 40 сая хонгконг доллар болж байгаа аж. Үүнээс үлдсэн хөрөнгийн 55 хувийг корпорацийн одоогийн өр зээлийг барагдуулахад, 35 хувийг хөрөнгийн нөөцийг нэмэгдүүлэхэд, үлдсэн 10 хувийг суурь хөрөнгөдөө шилжүүлэхээр шийдвэрлэсэн байна. Даваа гарагт тус корпорацийн оролцсон түншлэл “Таван Толгой"-ийн сонгон шалгаруулалтад ялалт байгуулсан юм. Энэхүү түншлэлд “Energy Resources"-аас гадна “China Shenhua Energy" болон “Sumitomo Corporation" багтаад байна. Цаашид хөрөнгө оруулалт хийх асуудлаар Монгол Улсын Засгийн газартай хэлэлцээ хийнэ. Албаныхны мэдээлснээр хэлэлцээ ирэх оноос эхлэх төлөвтэй байна. Шалгарсан хөрөнгө оруулагч нь Цанхийн хэсгийн олборлолт, борлуулалт зэрэг бүх үйл ажиллагааг хариуцахаас гадна дэд бүтцийг шийдэж, “Chalco"-д төлөх өрийг барагдуулах шаардлагатай болжээ. Түүнчлэн “Таван Толгой"-ийн хувьцааг Хөрөнгийн биржид гаргаж, иргэн бүрт 1072 ширхэг хувьцаа олгох асуудлыг ч хариуцахаар болсон байна.

Д.Хаш-эрдэнэ

Холбоо барих: hasherdene.d@bloombergtvmongolia.com

minjma.g@bloombergtvmongolia.com