Японы хамгийн том банк болох “Mitsubishi UFJ Financial Group”-ын цэвэр ашиг шинжээчдийн таамаглаж байснаас өндөр гарлаа. Тус банкны санхүүгийн жилийн гуравдугаар улирал өнгөрсөн 12 дугаар сарын 31-нд дуусгавар болсон байна. Энэ улиралд “Mitsubishi UFJ Financial Group” 255.2 тэрбум иенийн цэвэр ашигтай ажилласан нь 2012 оны мөн үеэс 5.5 хувиар өссөн дүн болжээ. Мөн сүүлийн есөн сарын хугацаанд цэвэр ашиг нь 785.4 тэрбум иен болж, 2012 оны мөн үеэс 48 хувиар нэмэгдсэн байна. Тус банкны 2013 оны санхүүгийн жил ирэх гуравдугаар сард дуусах үед 9010 тэрбум иений цэвэр ашиг олно гэж тооцоолж байгаа юм. “Mitsubishi UFJ Financial Group”-ээс гадна Японы бусад санхүүгийн томоохон корпорациуд санхүүгийн бүтэн жилийн ашгаа нэмэгдүүлэх зорилт тавин ажиллаж байгаа ажээ. Энэ нь үнэт цаасны зах зээлийн үзүүлэлтүүд сайн байгаагаас үүдэж хөрөнгө оруулалт нэмэгдэж байгаатай холбоотой юм. Японы Төв банк инфляцийг нэмэх зорилгоор Засгийн газрынхаа бондыг худалдан авах зэргээр мөнгөний зөөлөн бодлого баримтлах болжээ. Үүнээс болж зээлдүүлэгчид Засгийн газрын бондоос хөрөнгөө татаж, зээлийн хэмжээгээ нэмэгдүүлж эхэлсэн байна. “Банкууд санхүүгийн бүтэн жилийн ашгаа 90 хувиар нэмэх төлөв гаргаад байгаа юм. Гэхдээ тэд энэ зорилтоосоо давж гарна” хэмээн “Deutsche Bank AG”-ын шинжээч Ёшинобу Ямада дүгнэжээ. 

Т.Элиса 

Холбоо барих: elisa.t@bloombergtvmongolia.com 

minjma.g@bloombergtvmongolia.com