“Apple” компанийн “iPhone”-ийн шинэ загварууд энэ баасан гарагаас худалдаанд гарч байна. Шинжээчдийн таамгаар “iPhone 6S” болон “iPhone 6S Plus” ухаалаг гар утас өнгөрсөн онд танилцуулсан загвараас цөөн тоогоор борлогдох төлөвтэй байгаа аж. “Pacific Crest Securities” компанийн судалгаагаар “iPhone”-ийн борлуулалт 2013 оноос хойш дунджаар 35 хувиар өссөн байна. Тухайлбал энэ оны I улиралд 74.6 сая “iPhone” буюу нэг цагт 34 мянган гар утас борлогджээ. Мөн өнгөрсөн жилүүдийн үзүүлэлтээс харахад “iPhone 4S”, “iPhone 5S” зэрэг "S" тодотголтой шинэчилсэн загварууд энгийн загвараас цөөн тоогоор борлогдсон байна. “Apple”-ийн нийт орлогын 60 орчим хувийг бүрдүүлдэг “iPhone” гар утасны шинэ загварууд эхний ээлжинд Шинэ Зеланд, Австрали, Япон , Сингапур зэрэг 12 оронд нэгэн зэрэг нээлтээ хийж байна. Харин энэ оны эцэс гэхэд 130 оронд бүтээгдэхүүнээ түгээсэн байна гэж тус компаниас мэдэгджээ. Харин Монгол Улсад ирэх аравдугаар сарын дундуур албан ёсоор худалдаалагдаж эхлэх төлөвтэй байна.

Б.Дашням

Холбоо барих: dashnyam.b@bloombergtvmongolia.com

minjma.g@bloombergtvmongolia.com