"Apple" компани Улаанбаатарын цагаар есдүгээр сарын 9-ний шөнө "iPhone" гар утасныхаа шинэ загварыг танилцуулж магадгүй байна. Өнгөрсөн оны энэ үед "iPhone 6" болон "iPhone 6 Plus" гар утаснуудыг танилцуулж байсан юм. Энэ нь 2007 онд анх "iPhone" гар утас худалдаанд гарснаас хойш загвар, дизайны хувьд хамгийн том өөрчлөлт болж байсан юм. Харин энэ удаад "Apple" компани ухаалаг гар утасныхаа сүүлийн загварыг өөрчлөхгүйгээр, дотоод техник болон програм хангамжийн шинэчлэл хийнэ гэж ажиглагчид үзэж байна.

Өнөөдөр болох арга хэмжээний үеэр шинэ гар утас танилцуулбал үндсэн болон нүүрний камерын чанар сайжраад зогсохгүй процессорын хурд өсөх магадлалтай байгаа юм. Түүнчлэн одоо худалдаанд байгаа мөнгөлөг цагаан, хар саарал, алтан шаргал өнгөнөөс гадна ягаан алтлаг өнгийн загвар нэмэгдэж магадгүй юм байна.

"Apple" компани "iPad" таблет компьютерээ ч гэсэн мартахгүй гэж ажиглагчид дүгнэжээ. Одоо зах зээлд борлуулагдаж байгаа 7.9 болон 9.7 инчийн дэлгэцтэй төхөөрөмжүүдээс том дэлгэцтэй "iPad" хэрэглэгчдэд хүрнэ гэж "Apple"-ийн бүтээгдэхүүнүүдийн талаар урьдчилсан таамгийг гаргадаг эх сурвалжууд мэдээлж байна. "Apple"-ийн Гүйцэтгэх захирал Тим Кук компанийн удирдлагыг гартаа авснаас хойш "iPad"-ийн борлуулалт буурч байсан юм.

АНУ-ын Сан Франциско хотод болох "Apple"-ийн ээлжит арга хэмжээнээс өмнө тус компанийн хувьцааны ханш мягмар гарагт гурван хувиар өсч хаагдсан байна. Ингэснээр дэлхийн хамгийн үнэ цэнэтэй компани "Apple"-ийн зах зээлийн үнэлгээ 640 тэрбум ам.долларыг даваад байна. Энэ нь өнгөрсөн онд "iPhone 6", "iPhone 6 Plus"-ийг танилцуулж байснаас 14.6 хувиар өссөн үзүүлэлт боллоо.

Г.Ану

Холбоо барих: anu.g@bloombergtvmongolia.com

minjma.g@bloombergtvmongolia.com