“Apple” компанийн (AAPL:US) ухаалаг төхөөрөмжид зориулсан “iOS” үйлдлийн системийн 9 дэх хувилбарт интернэтийн “Wi-Fi” холболтоос “3G” дата хэрэглээ рүү автоматаар шилжих тохиргоог багтааж өгчээ. “iOS 9” үйлдлийн системийн бета хувилбарын өнөөдөр гарсан шинэчлэлийн дагуу төхөөрөмжийн “Settings” буюу тохиргооны цэсэнд “Wi-Fi Assist” гэсэн тохиргоо нэмэгдсэн байгаа юм.

Энэ нь хэтэрхий олон хүн ашиглаж байгаагаас сүлжээ нь тогтворгүй болсон болон хэт хол байгаагаас хүлээн авах зэрэглэл бага байгаа “Wi-Fi”-д холбогдохоос сэргийлэх зориулалттай юм байна. Ингэснээр интернэт холболт шаардлагатай аппликейшнүүд хэрэглэхэд гацахгүй, удаан ачаалахгүй болох давуу талтай. Гэхдээ тус тохиргоог идэвхжүүлсэн тохиолдолд “3G” дата хэрэглээ нэмэгдэнэ гэсэн үг юм.

“Apple” компани ухаалаг төхөөрөмжийнхөө шинэ үйлдлийн системийг голчлон 9-р сард, худалдан авалтын улирал эхлэхийн өмнөхөн гаргадаг. Энэ нь шинээр худалдаанд гаргаж байгаа бүтээгдэхүүнийхээ борлуулалтыг дэмжих зорилготой байдаг юм. Хэрэв уламжлал давтагдана гэвэл “iOS 9” үйлдлийн систем ирэх сард хэрэглэгчдэд хүрнэ.

Г.Ану

Холбоо барих: Anu.G@bloombergtvmongolia.com