Торонтогийн Хөрөнгийн биржид бүртгэлтэй “Ion Energy” компани “Ургах наран” талбайд анхны хайгуулын ажлын хөтөлбөрөө дуусгасан байна.

Тус компани энэ оны IV-V сард 820 метрт 72 цооног өрөмдөж, 427 сорьцод геохимийн шинжилгээ хийсэн байна.

Эхний шатны хайгуулын ажлын үр дүнд “Ургах наран” талбайн “Давст” нуурын гадаргаас 918 милиграмм лити илрүүлснээ мэдээллээ. “Ion Energy” компани өнгөрсөн оны хоёрдугаар сард энэхүү талбайд хайгуул хийх тусгай зөвшөөрлөө авсан юм.

Харин “Баавгай уул” талбайд энэ оны III улиралд гидрогеологийн сорьцын шинжилгээ хийх юм байна. Өнгөрсөн онд “Ion Energy” компани дээрх талбайд 222 цооног өрөмджээ.

Тус компани Монголд брайн төрлийн литийн орд нээхээр хайгуул хийж байгаа бөгөөд 111 мянга 500 га талбайг хамарсан хайгуулын хоёр тусгай зөвшөөрөл эзэмшиж байна. “Ion Energy” Монголд литийн хайгуулын чиглэлд үйл ажиллагаа явуулж буй анхны компани юм.

С.Өнөрсайхан | @unursaikhan_sor

Холбоо барих: unursaikhan.s@bloombergtvmongolia.com

minjma.g@bloombergtvmongolia.com