“Google” компани (GOOG:US) “Hangouts” мессенжертээ зориулан, бие даасан веб хуудас гаргажээ. Өнөөдрөөс эхлэн hangouts.google.com хуудасны ачаар “Google”-ийн текст болон видео чат нь “Google+” болон “Gmail” үйлчилгээнээс хамааралтай байхаа больж, өөрийн гэсэн бие даасан үйлчилгээ болж байна. Ингэснээр “Hangouts”-ийн мессенжер, видео дуудлага, видео чат гэсэн гурван үндсэн үйлчилгээ хэрэглэгчдэд хүрэх нь сайжирч, өнгө төрх нь илүү ил тод болгож байгаа юм.

Саяхан “Alphabet” гэх толгой холдинг компани байгуулсан “Google” сүүлийн хэдэн сарын турш “Hangouts”-ийг нилээд хөгжүүлсэн. Энэ сарын эхээр “iOS” болон “Android” үйлдлийн системтэй хөдөлгөөнт төхөөрөмжид зориулсан аппликейшний загварыг шинэчилж, хэрэглэхэд хялбар болгож байсан юм.

Нийгмийн сүлжээний “Facebook” компани (FB:US) ч “Hangouts”-тай ижил төстэй “Messenger” үйлчилгээгээ үндсэн платформоос нь салгаж, бие даасан аппликейшн болгосон. Энэ оны 4-р сард веб хөтчид зориулсан “Messenger” үйлчилгээ гарч байсан юм. “Facebook”-ийн “Messenger”-ийг веб хөтчөөс ашиглахад заавал “Facebook” хаягтай байх шаардлагагүй байдаг.

Г.Ану

Холбоо барих: anu.g@bloombergtvmongolia.com