“Google” компани “Nexus 5”, “Nexus 6” гар утаснуудын шинэчилсэн хувилбаруудыг танилцууллаа. Шинэ ухаалаг гар утаснууд нь хамгийн сүүлийн үеийн андройд үйлдлийн систем болох “Marshmallow” дээр ажиллах анхны загварууд гэдгээрээ онцлог болж байгаа юм. Энэ удаад “Google” компани “Nexus 5Х”-ийн үйлдвэрлэлд БНСУ-ын “LG Electronics” компанитай дахин хамтарсан байна. Харин “Nexus 6P” загварыг БНХАУ-ын “Huawei” компани хариуцан ажиллахаар тохиролцжээ. “Nexus 6P”-ийн үнэ 499 ам.доллараас харин “Nexus 5X”-ийнх 379 ам.доллараас эхэлж байгаа юм. Энэхүү ухаалаг гар утасны борлуулалт аравдугаар сарын дунд үеэс эхэлнэ.

"Google"-ийн "Pixel C" таблет

Үүнээс гадна мягмар гарагт “Google” компани 10.2 инчийн дэлгэцтэй “Pixel C” шинэ таблетаа танилцуулсан нь олны анхаарлыг ихээхэн татаж байна. Соронзон “keyboard”-ийг таблеттай хослуулсан шинэ бүтээгдэхүүн нь “Apple”, “Microsoft” компаниудтай өрсөлдөхөд чиглэгджээ. Өөрөөр хэлбэл 10.2 инчийн дэлгэцтэй энэхүү таблетийн зорилтот хэрэглэгчдээр бизнесийн салбарт ажиллагсдыг сонгосон байна. “Pixel C” нь зах зээлд 499 ам.доллараар худалдаалагдана. “Google”-ийн Бүтээгдэхүүн удирдлагын хэлтсийн захирал Андрей Бауэрс "Pixel C бол таблет болон “keyboard”-ийг хослуулсан цоо шинэ арга техник. Таблетийн хэсгүүд хоорондоо соронзоор холбогддог. Хэрэв та таблетаа ашиглах хэрэгтэй бол “keyboard”-ийнхаа ард хүргэх хэрэгтэй. Ингэснээр таблет соронзоор “keyboard”-тай холбогдоно. Түүнчлэн дэлгэц нь 100-130 градус эргэх боломжтой болох”-ыг онцолсон байна.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com