БНСУ-ын технологийн хамгийн том компани “Samsung Electronics” (5930:KS) энэ сарын 13-нд “Galaxy Note 5” болон “Galaxy S6 Edge Plus” утаснуудаа танилцуулах товтой байсан ч эдгээр утаснуудын зураг товлосон цагаасаа 2 долоо хоногийн өмнө олны хүртээл боллоо.

“Galaxy S6 Edge Plus” утас нь нэрэндээ тохирсон загвартай байна гэж хэлж болохоор байна. Утасны хэлбэр загварыг харвал энэ оны 3-р сард худалдаанд гарсан 5.1 инчийн дэлгэцтэй “Galaxy S6 Edge”-ийн томруулсан хувилбар байгаа юм.

Харин “Galaxy Note 5” утасны загварыг харвал “Galaxy S6”-ийн адил металл болон шилэн дизайнтай болсон нь харагдаж байна. Гэхдээ утасны өнцөг нь илүү хурц болж өгчээ.

“Galaxy Note 5” утас 5.66 инчийн 2560*1440 пикселийн дэлгэцтэй байна гэж эдгээр зургуудыг дэлгэсэн Эван Бласс мэдэгдлээ. Энэ нь “Note 5” утастай ижил байгаа ч утасны дотоод төхөөрөмжүүдийг харвал 4ГБ-ын хурдтай, 32ГБ-ын санах ойтой байгаа нь “Galaxy S6”-аас ч илүү сайжирсан үзүүлэлт юм.

Г.Ану

Холбоо барих: Anu.G@bloombergtvmongolia.com