Хоёрдугаар сарын 18-ны өдрийн байдлаар 9257 хүн PCR болон түргэвчилсэн шинжилгээ өгснөөс COVID-19-ийн халдварын 761 тохиолдол батлагдсан байна. Улсын хэмжээнд PCR шинжилгээгээр батлагдсан нийт тохиолдол 459 мянга 944 боллоо.

Түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол өмнөх өдрөөс 2324-өөр нэмэгдэж, 896 мянга 45 болов.

Сүүлийн нэг хоногт “коронавирус”-ийн халдварын улмаас 40-80 насны гурван хүн нас барсныг Эрүүл мэндийн яам мэдээлэв. COVID-19-ийн нэн хүнд хэлбэрээр 2155 хүн эндээд байна.

Өнөөдрийн байдлаар “коронавирус”-ийн халдвар авсан 5573 хүн эмнэлэгт хэвтэн эмчлүүлж байгаагаас 48 хүний биеийн байдал нэн хүнд, 3478 хүний биеийн байдал хүндэвтэр байгаа аж. Харин 18 мянга гаруй хүн Өрхийн эмчийн хяналтад гэрээрээ эмчлүүлж байна.

Эрүүл мэндийн яамны мэдээлснээр эмнэлэгт хэвтэн эмчлүүлж буй хүмүүсийн 9.9 хувь нь эмнэл зүйн нэн хүнд, хүнд хэлбэрээр өвдсөн байна. Өнгөрсөн долоо хоногтой харьцуулахад нэн хүнд болон хүнд тохиолдлын хувь 0.8 хувиар буурчээ. Ерөнхийдөө өндөр настай, хавсарсан эмгэгтэй, дархлаажуулалтад хамрагдаагүй иргэд нэн хүнд болон хүндээр өвдөж байгааг онцоллоо.

Үүнээс гадна иргэдийн хөл хөдөлгөөн нэмэгдсэнтэй холбоотойгоор халдварын тохиолдол нэмэгдэх хандлага байгаа ажээ.

Улсын хэмжээнд нийт хүн амын 31 хувь нь дархлаа сэргээх нэмэлт I тунд, 2.9 хувь нь дархлаа сэргээх нэмэлт II тунд хамрагдаад байна.

COVID-19-ийн халдварын эсрэг вакцинжуулалт эхэлснээс хойш нийслэлийн зорилтот хүн амын 75.1 хувь нь I тунд, 72 хувь нь II тунд, 53 хувь нь III тунд, харин 5.7 хувь нь дархлаа сэргээх нэмэлт IV тунд хамрагджээ.

Өнгөрсөн нэг хоногт нийслэлийн хэмжээнд I тунд 27, II тунд 35, III тунд 302, IV тунд 397, нийт 761 иргэнийг дархлаажуулсан байна.

Холбоо барих: minjma.g@bloombergtvmongolia.com