Нэгдүгээр сарын 10-ны өдрийн байдлаар COVID-19-ийн халдварын 649 тохиолдол батлагдсаныг Эрүүл мэндийн яам мэдээлэв.

8464 сорьцод хийсэн шинжилгээгээр нийслэлд 465, орон нутагт 174, зөөвөрлөгдсөн 10 тохиолдол бүртгэгджээ. Батлагдсан тохиолдлуудын 478 нь хүүхдүүд байгаа аж. Одоогоор улсын хэмжээнд нийт тохиолдлын 21.7 хувийг хүүхдийн өвчлөл эзэлж байна. Сүүлийн нэг хоногт Ховд аймагт хамгийн олон буюу 34 тохиолдол батлагджээ.

Өнөөдрийн байдлаар улсын хэмжээнд PCR шинжилгээгээр батлагдсан нийт тохиолдол 396 мянга 231 боллоо. Дотоодод бүртгэгдэх халдварын тоо долоо хоногийн дунджаар 372 хувиар өссөн гэж ХӨСҮТ мэдээллээ.

Харин түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол 705 мянга 986 болоод байна. Нийслэлд батлагдсан COVID-19-ийн халдварын тохиолдол 388 мянга даваад байгаа аж.

Сүүлийн нэг хоногт “коронавирус”-ийн халдварын улмаас хоёр хүн нас баржээ. COVID-19-ийн нэн хүнд хэлбэрээр 2074 хүн эндээд байна.

Улсын хэмжээнд COVID-19-өөр өвчилсөн 4090 хүн эмнэлэгт хэвтэн эмчлүүлж байгаа бол 10 мянга 510 хүн Өрхийн эмчийн хяналтад гэрээр эмчлүүлж байгаа аж. Гэрээр эмчлүүлж буй хүний тоо эрс өсөөд байна.

Даваа гарагийн байдлаар улсын хэмжээнд нийт хүн амын 69.7 хувь нь I тунд, 66.6 хувь нь II тунд, 28.8 хувь нь дархлаа сэргээх нэмэлт гурав дахь тунд хамрагдаад байна. Харин 18-аас дээш насны 2300 гаруй хүн дөрөв дэх тунд хамрагджээ.

Холбоо барих: minjma.g@bloombergtvmongolia.com