Их Британийн Ерөнхий сайд Борис Жонсон “COVID-19”-ийн халдвар авсан нь тогтоогдсоноос хойш 10 хоногийн дараа эмнэлэгт хэвтсэн байна.

Шинэ төрлийн “коронавирус”-ийн тархалтын голомт болсон зарим орнуудад нас баралт ням гарагийн байдлаар өмнөх өдрүүдээсээ буураад байна. Тухайлбал: Нью-Йорк мужид нас баралт анх удаа буурсан бол Италид нас баралт сүүлийн хоёр долоо хоногийн доод түвшинд хүрсэн байна. Мөн Францад нас баралт өмнөх таван өдрийнхөөс цөөн тоогоор бүртгэгдсэний зэрэгцээ Испанид гурван өдөр дараалан буурчээ.

Дэлхийн хэмжээнд “COVID-19”-ийн халдвар авсан хүний тоо нэг сая 272 мянга хүрч, 69.4 мянган хүн нас бараад байна. Харин эдгэрсэн хүний тоо 262 мянга байна.

Амралтын өдрүүдэд Токиод халдварын тохиолдол огцом нэмэгдэж, 1000 давжээ. Японы Ерөнхий сайд Абэ Шинзо ойрын хугацаанд онц байдал зарлаж магадгүй байна.

Түүнчлэн Германы Канцлер Ангела Меркель “Улаан өндөгний баяр”-аар гэрээсээ гарахгүй байхыг иргэддээ уриалжээ.

АНУ-д халдварын шинэ тохиолдлууд улсын хэмжээнд бүртгэгдэж байгаа энэ үед хамгийн "Хүнд долоо хоногууд биднийг хүлээж байна" гэж тус улсын Ерөнхийлөгч Дональд Трамп мэдэгдлээ.

АНУ-ын Ерөнхийлөгч Дональд Трамп
“Бид бүх зарцуулалтаа нэг газарт төвлөрүүлэхийг хүсэхгүй байна. АНУ-ын иргэдээ хамгаалахын тулд бид бүгдийг хийх болно. Иргэдээ эрүүл, аюулгүй байлгахын тулд боломжит бүх хүч, нөөц бололцоогоо ашиглана. Бид энэ дайныг дуусгамаар байна. Бид ажилдаа эргээд орох хэрэгтэй. Улсаа эргээд нээлттэй болгох хэрэгтэй. Мужуудад үзүүлэх тусламжийг нэмэгдүүлэхийн тулд бид олон мянган цэрэг, усан цэрэг, эмнэлгийн ажилтан, мэргэжилтнүүд, эмч сувилагч нарыг дайчилна. Маш олноор нь. Хүнд өдрүүд бидний өмнө ирээд байна” гэж мэдэгдлээ.

Харин Дэлхийн эрүүл мэндийн байгууллагаас цар тахалтай тэмцэхэд санхүүгийн хүндрэлтэй тулгарч байгаа орнуудад туслалцаа үзүүлэхээ амласан байна. Мөн улс орнуудыг хязгаарлалтын арга хэмжээнүүдээ сулруулахгүй байхыг зөвлөжээ.

ДЭМБ-ын тэргүүн Тедрос Адханом
“Нөхцөл байдал эрүүл мэндийн салбарын хямралаар хязгаарлагдахгүй болсныг бид харж байна. Цар тахал нийгэм, эдийн засгийн ямар үр дагавар бий болгох талаар бүгд судалж байна. Улс орнууд хүмүүсийн эрүүл мэндийг хамгаалахын тулд авч буй хязгаарлалтын арга хэмжээнүүд нь хувь хүн, өрхүүдийн орлого, улс орнуудын эдийн засагт хүчтэй нөлөөлж байна. Бид хүний амь нас, амьжиргаа аль алиныг нь хамгаалах сорилттой тулгараад байна” гэж онцлов.

Олон Улсын Валютын Сан дэлхий нийтээр хүндрэлд орсныг зарлаж шинэ төрлийн “коронавирус”-ийн эдийн засгийн нөлөө "Дэлхийн санхүүгийн хямралынхаас хүчтэй" байна гэж мэдэгджээ.

ОУВС-ийн тэргүүн Кристалина Георгиева
“Энэ бол өмнө нь байгаагүй хүндрэл. ОУВС-ийн түүхэнд бид дэлхийн эдийн засаг зогсонги байдалд орохыг харж байгаагүй. Бид хүндрэлд ороод байна. Дэлхийн санхүүгийн хямралаас ч хүнд байдалд ороод байна. Эрүүл мэндийн систем нь төдийлөн сайн биш олон улс орон олон бий. Аюулгүй байдлыг хамгаалах зорилгоор хөгжиж буй орнуудаас маш их хөрөнгө гадагшилсан. Ойролцоогоор 90 тэрбум ам.доллар гадагшилсан байна. Энэ нь дэлхийн санхүүгийн хямралын үеийнхээс хамаагүй өндөр дүн юм. Шинэ төрлийн "коронавирус"-ийн эдийн засгийн нөлөө дэлхийн санхүүгийн хямралынхаас гүн байна” гэж мэдэгдлээ.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com