Нэгдүгээр сарын 18-ны өдрийн байдлаар 26 мянга 496 сорьцод хийсэн шинжилгээгээр COVID-19-ийн халдварын 2135 тохиолдол батлагдсан байна. Өнөөдрийн байдлаар улсын хэмжээнд PCR шинжилгээгээр батлагдсан нийт тохиолдол 412 мянга 452 боллоо. Нийслэлд 1344, орон нутагт 791 тохиолдол бүртгэгдсэнийг Эрүүл мэндийн яам мэдээлэв.

Харин түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол өмнөх өдрөөс 5640-өөр нэмэгдэж, 747 мянга 322 болоод байна.

Сүүлийн нэг хоногт “коронавирус”-ийн халдварын улмаас гурван хүн нас баржээ. COVID-19-ийн нэн хүнд хэлбэрээр 2089 хүн эндээд байна.

Улсын хэмжээнд COVID-19-өөр өвчлөн эмнэлэгт хэвтэн эмчлүүлэх хүний тоо хоногт 662-оор нэмэгдлээ. Харин хөнгөн хэлбэрийн оноштой 36 мянга 229 хүн Өрхийн эмчийн хяналтад гэрээр эмчлүүлж байна.

Мягмар гарагийн байдлаар 975 мянга 13 хүн гурав дахь тунд, дархлаа сэргээх нэмэлт дөрөв дэх тунд 44 мянга 305 хүн хамрагдаад байгаа ажээ.

Холбоо барих: minjma.g@bloombergtvmongolia.com