Нэгдүгээр сарын 12-ны өдрийн байдлаар COVID-19-ийн халдварын 1818 тохиолдол батлагдсан байна. Нийслэлд 1227, орон нутагт 565, зөөвөрлөгдсөн 26 тохиолдол бүртгэгдсэнийг Эрүүл мэндийн яам мэдээллээ. Сүүлийн нэг хоногт Төв аймагт хамгийн олон буюу 108 тохиолдол батлагджээ.

Өнөөдрийн байдлаар улсын хэмжээнд PCR шинжилгээгээр батлагдсан нийт тохиолдол 399 мянга 257 боллоо.

Харин түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол өмнөх өдрөөс 3222-оор нэмэгдэж, 712 мянга 651 болоод байна.

Сүүлийн нэг хоногт “коронавирус”-ийн халдварын улмаас хоёр хүн нас баржээ. COVID-19-ийн нэн хүнд хэлбэрээр 2076 хүн эндээд байна.

Улсын хэмжээнд COVID-19-өөр өвчилсөн 4781 хүн эмнэлэгт хэвтэн эмчлүүлж байгаагаас 713 нь хүүхдүүд байна. Харин хөнгөн хэлбэрийн оноштой 14 мянга 354 хүн Өрхийн эмчийн хяналтад гэрээр эмчлүүлж байгаа аж.

Лхагва гарагийн байдлаар улсын хэмжээнд 946 мянга 536 хүн буюу нийт хүн амын 29.1 хувь нь дархлаа сэргээх нэмэлт тунд хамрагдаад байгааг Эрүүл мэндийн яам мэдээллээ. Сүүлийн нэг хоногт 5400 гаруй хүн гурав дахь тун хийлгэжээ. Өнөөдрийн байдлаар дөрөвдүгээр тунд 10 мянга 247 хүн хамрагдаад байна.

Одоогоор гуравдугаар тунд хамрагдсан иргэдийн 2.4 хувь нь халдвар аваад байна.

Холбоо барих: minjma.g@bloombergtvmongolia.com