Нэгдүгээр сарын 11-ний өдрийн байдлаар COVID-19-ийн халдварын 1208 тохиолдол батлагдсан байна. Нийслэлд 842, орон нутагт 330, зөөвөрлөгдсөн 36 тохиолдол бүртгэгджээ.

Өнөөдрийн байдлаар улсын хэмжээнд PCR шинжилгээгээр батлагдсан нийт тохиолдол 397 мянга 439 боллоо.

Харин түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол өмнөх өдрөөс 3443-аар нэмэгдэж, 709 мянга 429 болоод байна. Нийслэлд батлагдсан COVID-19-ийн халдварын тохиолдол 390 мянга 594 болжээ.

Сүүлийн нэг хоногт эмнэлэгт хэвтэн эмчлүүлэх хүний тоо өмнөх өдрөөс 400 гаруйгаар нэмэгджээ. Улсын хэмжээнд COVID-19-өөр өвчилсөн 4483 хүн эмнэлэгт хэвтэн эмчлүүлж байгаагаас 662 нь хүүхдүүд байна. Харин хөнгөн хэлбэрийн оноштой 11 мянга 259 хүн Өрхийн эмчийн хяналтад гэрээр эмчлүүлж байна.

Халдварын тархалт ийнхүү эрчимжиж байгаагаас ойрын хугацаанд эмнэлгүүдэд 1200 ор нэмж дэлгэхээр бэлтгэж эхэлснийг Улсын онцгой комисс мэдээлээд байна. Одоогоор 4000 ор бэлдээд байгаа ажээ.

Мягмар гарагийн байдлаар улсын хэмжээнд 941 мянга 119 хүн буюу нийт хүн амын 28.9 хувь нь дархлаа сэргээх нэмэлт гурав дахь тунд хамрагдаад байна. Харин дөрөв дэх тунд нийт 5400 гаруй хүн хамрагджээ.

Холбоо барих: minjma.g@bloombergtvmongolia.com