Нэгдүгээр сарын тавны өдрийн байдлаар COVID-19-ийн халдварын 585 тохиолдол батлагдсаныг Эрүүл мэндийн яам мэдээлэв. Халдварын тохиолдол өмнөх өдрөөс 100 орчмоор нэмэгдлээ.

Нийслэлд COVID-19-ийн халдварын 385, орон нутагт 196, зөөвөрлөгдсөн дөрвөн тохиолдол бүртгэгджээ. Өмнөговь аймагт хамгийн олон буюу 47 тохиолдол батлагдсан байна.

Өнөөдрийн байдлаар улсын хэмжээнд PCR шинжилгээгээр батлагдсан нийт тохиолдол 392 мянга 189 боллоо.

Харин түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол хоногт 745-аар нэмэгдэж, 695 мянга 941 болоод байна.

Сүүлийн нэг хоногт “коронавирус”-ийн халдварын улмаас гурван хүн нас баржээ. COVID-19-ийн нэн хүнд хэлбэрээр 2065 хүн эндээд байна.

Лхагва гарагийн байдлаар улсын хэмжээнд 922 мянга 681 хүн буюу нийт хүн амын 28.4 хувь нь дархлаа сэргээх нэмэлт тунд хамрагдаад байна. Өнгөрсөн нэг хоногт 3200 гаруй хүн гурав дахь тун хийлгэжээ.

Үүнээс гадна дархлаа сэргээх нэмэлт тунд хамрагдаад гурван сар болсон иргэдийг IV тунд хамруулахыг сайн дурын үндсэн дээр зохион байгуулахаар төлөвлөж байгааг Эрүүл мэндийн сайд мэдээлэв. Мөн тэрбээр COVID-19-ийн тархалт эрчимжихийн зэрэгцээ улсын хэмжээнд томуугийн дэгдэлт нэмэгдээд байгааг онцоллоо.

Улсын хэмжээнд эмнэлэгт хэвтэн эмчлүүлж буй хүүхдүүдийн 26 хувь нь амьсгалын замын цочмог хүнд халдвараар өвчлөөд байгаа аж.

Холбоо барих: minjma.g@bloombergtvmongolia.com