АНУ-ын эмнэлгийн тусламжийн байгууллага “AmeriCares” нэг сая ам.долларын тусламжийн барааг Филиппин рүү усан онгоцоор тээвэрлүүлэхээр боллоо. Хар шуурганд хамгийн их нэрвэгдсэн Филиппиний бүс нутгуудад энэхүү тусламжийн барааг хүргэхээр болсон байна. “AmeriCares”-ын төлөөлөгч энэ талаар “20 мянган хүнийг гурван сарын турш хангахуйц яаралтай эмийн тусламжийг хүргүүлж байна” хэмээн онцолжээ. “Хайян” хар салхины улмаас Филиппинд 2357 хүн амиа алдаж, 4000 гаруй хүн гэмтэж бэртсэн байна. Түүнчлэн уг арлын газар нутгийн 80 орчим хувь нь эвдэрч сүйджээ. Албаныхны мэдээлснээр "Хайян" шуурганд Филиппиний 37 мужийн 11 сая гаруй иргэн хүнд, хөнгөн байдлаар өртөөд байна. Өнөөдрийн байдлаар 673 мянга гаруй хүн орон гэргүй болж, 2,5 сая хүн хоол тэжээлийн дутагдалд орж, тус улс даяар нийт 18 тэрбум ам.долларын хохирол учирсан гэсэн тооцоо байна.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com