2021 онд АНУ-ын кино театруудын орлого 4.4 тэрбум ам.доллар хүрсэн байна. Энэ нь 2020 онд 1.4 тэрбум ам.доллар хүрч байснаас 213 хувиар өссөн үзүүлэлт боллоо.

Харин 2018 болон 2019 онд буюу цар тахал эхлэхээс өмнө 2021 оныхоос 60 хувиар өндөр орлого болж байжээ. Энэ онд нээлтээ хийхээр товлогдоод байсан “Jurassic World: Dominion”, “Minions: The Rise of Gru”, “Top Gun: Maverick” зэрэг бүтээлийн нээлт цар тахлын улмаас ирэх он хүртэл хойшлоод байгаа юм. Эдгээр бүтээлүүд төлөвлөсөн хугацаандаа үзэгчдийн хүртээл болсон бол энэ оны “Box Office”-ийн орлого найман тэрбум ам.доллар дөхөх байсан гэж “Forbes”-ийн шинжээчид тооцоолсон байна.

2021 оны байдлаар АНУ-ын болон дэлхийн зах зээлээс хамгийн өндөр орлого олсон киногоор “Spider-Man: No Way Home” кино тодорчээ. Энэхүү бүтээл нь АНУ-ын “Box Office”-д 621 сая гаруй ам.доллар, харин дэлхийн хэмжээнд 1.3 тэрбум гаруй ам.долларын орлого олсон байна.

Харин Монгол Улсын хувьд 2021 онд хамгийн олон үзэгчтэй байсан болон борлуулалтаараа тэргүүлсэн киногоор “Манайд 1 удаа” уран сайхны кино шалгарсан аж. Өнгөрсөн онд “Манайд 1 удаа” киноны 75 мянга гаруй тасалбар борлуулагджээ. Үүний араас “Хуулиас гадуур”, “Гангстерууд” зэрэг бүтээлүүд бичигдэж байна.

“Spider-Man: No Way Home” кино Монгол Улсын 11 кино театрт нээлтээ хийж, нээлтээ хийсэн өдрүүдэд 33 мянга гаруй тасалбар борлуулсан байна. Харин 2019 онд нээлтээ хийж байсан “Avengers: End Game” кино нээлтийн өдрүүдэд 52 мянга гаруй тасалбар борлуулж, дээрх үзүүлэлтийг тэргүүлж байна.

О.Цэнгэг | @TsengegO

Холбоо барих: tsengeg.o@bloombergtvmongolia.com

minjma.g@bloombergtvmongolia.com