2013 онд Монгол Улсын банкны системд томоохон шинэчлэлүүд хийгдсэн гэж салбарынхан дүгнэж байна. Үүнээс хамгийн гол нь орон сууцны ипотекийн санхүүжилтийн зээлийн тогтолцоог илүү боловсронгуй болгосон явдал байсан гэж Банкуудын холбоо дүгнэлээ. Энэ хүрээнд өнөөдрийн байдлаар 12.6 мянган иргэн найман хувийн хүүтэй зээлийн хүрээнд шинээр орон сууц худалдан авчээ.Түүнчлэн Хадгаламжийн даатгалын корпораци байгуулагдаж зээлийн батлан даалтын сан үйл ажиллагаагаа эхлүүлснийг онцолсон байна. Мөн үл хөдлөх хөрөнгө болон өр төлбөрийн лавлагааг банкууд шууд цахим хэлбэрээр хүлээн авдаг болсон нь банкны аливаа зээл, гүйлгээг чирэгдэлгүй болгоход чухал хувь нэмэр оруулсан байна. Харин Улаанбаатар хотод анх удаа Азийн банкуудын холбооны гишүүд чуулсан нь Монгол Улсын банкны салбарын өсөлт, хөгжил, хандлагыг сурталчилсан том үйл явдал болсон гэж Банкуудын холбооноос дүгнэж байна. Үүнээс гадна сүүлийн таван жилд Монгол Улсад гадаадын банк төлөөлөгчийн газраа нээгээгүй байсан хандлага 2013 онд эрс өөрчлөгдөж, бүс нутгийн тэргүүлэх  гурван ч банк төлөөлөгчийн газраа нээлээ. Дотоодод "Хадгаламж" банкийг "Төрийн" банкинд нэгтгэх шийдвэр гарч, арилжааны 13 банк үйл ажиллагаа явуулах болсон юм. Эдгээрээс гадна 100-аас дээш сая төгрөгийн, нэг жил хүртэл болон хугацаагүй хадгаламжийн хүүгийн орлогод татвар ногдуулж эхэлсэн болон байгаль орчинд ээлтэй, тогтвортой санхүүжилтийн хөтөлбөрийг хэрэгжүүлэхээр болсныг мөн онцолжээ. Харин УИХ-аас өнгөрсөн тавдугаар сард "Мөнгө угаах болон терроризмыг санхүүжүүлэхтэй тэмцэх" хуулийг баталснаар хар жагсаалтад орох аюулаас сэргийлсэн гэж Банкуудын холбоо үзэж байна. 2013 оны эцэст банкны салбар шилдгүүдээ тодруулж, есөн банкирыг шилдгээр тодруулсан бол Банкуудын холбооны дээд шагнал "Хаш эрдэнийн одон"-ийн анхны эзнээр ХХБ-ны Гүйцэтгэх захирал Б.Мэдрээг тодруулжээ.

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com