“Petro China Dachin Tamsag” компанийн нефть олборлолтын 19 дүгээр талбайд болсон ослоос хойш 20 хоногийн хугацаанд тээвэрлэлтийн үйл явцыг нь бүрэн зогсоох талаар Уул, уурхайн дэд сайд О.Эрдэнэбулган мэдээллээ. Мөн тэрбээр өнгөрсөн онд Монгол Улс 5.2 сая баррель газрын тос экспортолсны дийлэнх хэсгийг нь Тамсагийн сав газраас олборлосон гэдгийг онцолсон юм. Энэ сарын 10-нд 19 дүгээр талбайн нефть ачих, тээвэрлэх хэсэгт гарсан галын улмаас найман машин шатаж, БНХАУ-ын хоёр иргэн амь насаа алдаад байна. Одоогоор Дорнод аймгийн Онцгой байдал, Цагдаа, прокурорын газрынхан ослын газрыг шалгаж, мөрдөн байцаалтын ажлыг эхлүүлжээ. Харин Онцгой байдлын Ерөнхий газрын дарга Т.Дуламдоржийн мэдээлснээр галын шалтгааныг энэ долоо хоногт багтааж тодруулахаар болсон байна. “Petro China Dachin Tamsag” компани энэ онд газрын тосны олборлолтоо 700 мянга гаруй тонн болгон нэмэгдүүлэхээр төлөвлөж байгаа талаар тус компаниас өмнө нь мэдээлж байсан юм. 

Т.Элиса 

Холбоо барих: elisa.t@bloombergtvmongolia.com 

minjma.g@bloombergtvmongolia.com