Өнгөрсөн сарын байдлаар Азийн дөрөвдэх хамгийн том эдийн засагтай улс болох Өмнөд Солонгосын хэрэглээний үнийн индексийн жилийн өсөлт 0.9 хувьтай гарсан байна. Хэдийгээр энэ нь аравдугаар сард 14 жилийн хамгийн доод түвшиндээ хүрч байснаас 0.2 хувиар өссөн дүн боловч эдийн засагчдын урьдчилсан таамгаас 0.1 хувиар бага үзүүлэлт болжээ. Харин сарын үзүүлэлтээрээ аравдугаар сард 0.3 хувийн бууралттай байсан Өмнөд Солонгосын инфляци 11 дүгээр сард 0.1 хувиар агшсан дүнтэй гарч байгаа аж. Гэхдээ энэ нь өнгөрсөн тавдугаар сараас хойш бодлогын хүүгээ 2.5 хувь барьсаар байгаа тус улсын Төв банкны зорилтод хэмжээ болох 1.5-3.5 хувийн өсөлтөөс доогуур үзүүлэлт болсон байна. Үүнээс гадна өнгөрсөн сард Өмнөд Солонгосын аж үйлдвэрийн салбарын идэвхжил сүүлийн зургаан сарын дээд түвшиндээ хүрсэн ч экспортын хэмжээ нь буурах төлөвтэй гарчээ. Тодруулбал, “HSBC” болон “Markit” байгууллагаас хамтран гаргадаг Өмнөд Солонгосын аж үйлдвэрийн салбарын худалдан авагч менежерүүдийн индексийн 11 дүгээр сарын үзүүлэлт өмнөх сараас 0.2 нэгжээр нэмэгдэж 50.4 болсон байна. Ийнхүү тус индекс 50 нэгжээс дээш үзүүлэлттэй гарсан нь тус улсын аж үйлдвэрийн салбар хоёр сар дараалан өсөлтийн төлвөө хадгалж байгаа явдал боллоо. Гэвч аравдугаар сард 53.7 нэгжтэй байсан экспортын шинэ захиалгыг тодорхойлдог дэд индекс 51.9 нэгж болж буурсан нь ирэх саруудад тус улсын аж үйлдвэрийн салбарын идэвхжил хүчээ алдаж магадгүйг илтгэж байгаа ажээ. 

Ц.Мөнхжин 

Холбоо барих: Munkhjin.ts@bloombergtvmongolia.com