Японы Ерөнхий сайд Абэ Шинзогийн Засгийн газар нэлээд удаан хугацаанд хэлэлцсэний дүнд өнөөдрөөс эхлэн нэг сарын хугацаанд Токио болон бусад 6 мужид онц байдал тогтоохоор шийдвэрлэлээ. Гэхдээ онц байдал тогтоох 7 бүсийг авч үзвэл Чиба, Сайтама, Канагава гээд нийслэл Токиог тойрсон төвийн бүсийн гэж хэлж болохоор нэгжүүд байгаа. Эдгээр нь хамтдаа Японы ДНБ-ий 48 хувийг бүрдүүлж байгаа. Тиймээс эдийн засгийн утгаар нь авч үзвэл Япон улсын эдийн засгийн хагас нь онц байдлын дэглэмд шилжих гэж байна гэж хэлж болохоор байгаа юм. "Хэрвээ бид бүгд хүчин чармайлт гаргаж, ард иргэдийн шууд холбоо харилцаа, хүмүүсийн бөөгнөрлийг хамгийн багадаа 70-80 хувиар бууруулж чадвал халдварын тархалтыг хоёр долоо хоногт тогтоон барьж шинэ тохиолдлуудын тоог бууруулах боломжтой" гэж Японы Ерөнхий сайд Абэ Шинзо мэдэгджээ. Мөн эдийн засгаа дэмжихийн тулд 108 их наяд иенийн санхүүжилтийн багцыг танилцуулаад байгаа. Энэ нь тус улсын ДНБ-ний 20 хувьтай тэнцэх хэмжээний мөнгөн дүн болж байна. Онц байдлын шийдвэртэй зэрэгцээд “Сitigroup” Японы эдийн засаг 2020 оны II улиралд 20 хувиар агшиж магадгүй байна гэсэн таамаг дэвшүүлсэн нь анхаарал татаж байна. Японы ДНБ 2019 оны төгсгөлийн улиралд 7 орчим хувиар буурч гарсан. Эрсдэл ийнхүү нэмэгдэж байгаа цаг үед Абэ Шинзогийн Засгийн газар иргэд болон бизнесүүддээ чиглэсэн дараах арга хэмжээг авч байна.

-Цар тахлын улмаас орлого нь огцом буурч, амьжиргаа нь хүндэрсэн өрхүүдэд 300 мянган иен олгоно

-Маш хүнд нөхцөлд байгаа жижиг дунд бизнесүүдэд хоёр сая иен, хувиараа хөдөлмөр эрхлэгчдэд нэг сая иен тус тус олгохоор болсон

Б.Ариунболд

Холбоо барих: ariunbold.b@bloombergtvmongolia.com

uyanga.m@bloombergtvmongolia.com