Япон улс өнгөрсөн 11 дүгээр сард гадаад худалдаанаас түүхэндээ гуравдугаарт бичигдэх ихээхэн хэмжээний алдагдал хүлээсэн талаар тус улсын Сангийн яам мэдээллээ. Хэдий тийм боловч гадаад худалдааны алдагдлын хэмжээ нь тооцоолж байснаас бага гарчээ. 11 дүгээр сард Япон улс 1.29 их наяд иенийн гадаад худалдааны алдагдалтай гарсан нь шинжээчдийн тооцоолж байсан 1.35 их наядтай харьцуулахад эерэг үзүүлэлт болсон байна. Тус улсын экспортын хэмжээ 11 дүгээр сард шинжээчдийн тооцоог давж, 18.4 хувиар өссөн нь алдагдал буурахад нөлөөлжээ. Харин шинжээчдийн зүгээс Японы экспорт 18 хувиар өснө гэж тооцоолж байсан аж. Түүнчлэн тус улсын импортын өсөлт нэг сарын өмнөхөөсөө харьцангуй удааширсан үзүүлэлттэй гарсан байна. 11 дүгээр сард өнгөрсөн жилийн мөн үеэс 21.1 хувиар өссөн нь шинжээчдийн тооцоолж байснаас 0.3 хувиар бага байгаад зогсохгүй, өмнөх сарын 26.2 хувийн өсөлттэй харьцуулахад саарсан дүн болжээ. 

Б.Дуламхорлоо 

Холбоо барих: dulamkhorloo.b@bloombergtvmongolia.com 

minjma.g@bloombergtvmongolia.com