Нэгдүгээр сарын дөрөвний өдрийн байдлаар COVID-19-ийн халдварын 488 тохиолдол батлагдсан байна. Энэ нь сүүлийн нэг сарын хугацаанд өдөрт бүртгэгдсэн хамгийн олон тохиолдол боллоо. Нийслэлд COVID-19-ийн халдварын 360, орон нутагт 100, зөөвөрлөгдсөн 28 тохиолдол бүртгэгджээ.

12 дугаар сарын хоёрны өдрөөс хойш Монгол Улсад өдөрт бүртгэгдэх халдварын тоо 400-аас доош байсан юм. Өнөөдрийн байдлаар улсын хэмжээнд PCR шинжилгээгээр батлагдсан нийт тохиолдол 391 мянга 604 боллоо.

Харин түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол хоногт 1650-аар нэмэгдэж, 695 мянга 196 болоод байна.

Улсын хэмжээнд COVID-19-өөр өвчилсөн 2179 хүн эмнэлэгт хэвтэн эмчлүүлж байгаа бол 3457 хүн Өрхийн эмчийн хяналтад гэрээр эмчлүүлж байгаа аж.

Сүүлийн нэг хоногт “коронавирус”-ийн халдварын улмаас хоёр хүн нас баржээ. COVID-19-ийн нэн хүнд хэлбэрээр 2062 хүн эндээд байна.

Мягмар гарагийн байдлаар улсын хэмжээнд 919 мянга 478 хүн буюу нийт хүн амын 28.3 хувь нь дархлаа сэргээх нэмэлт тунд хамрагдаад байна. Өнгөрсөн нэг хоногт 2430 хүн гурав дахь тун хийлгэжээ.

Сүүлийн өдрүүдэд вакцинжуулалтын идэвх буурах хандлагатай байна. Тухайлбал: 11 дүгээр сард өдөр дунджаар 10 мянга гаруй иргэн гурав дахь тун хийлгэж байсан аж.

Холбоо барих: minjma.g@bloombergtvmongolia.com