Тавдугаар сарын 10-ны өдрийн 11.00 цагийн байдлаар 639 хүнээс “коронавирус”-ийн халдвар илэрч, улсын хэмжээнд батлагдсан нийт тохиолдол 45 мянга 489 боллоо.

Шинэ тохиолдлуудын 92.8 хувь нь нийслэлд бүртгэгдсэн байна. Нийт халдвар авсан хүмүүсийн дийлэнх нь 20-50 насны буюу хөдөлмөрийн насны иргэд байгааг Эрүүл мэндийн яам онцлов. Хөл хорио тогтоогоогүй бол өдөрт 3000-аас илүү халдварын тохиолдол бүртгэгдэх байсныг мэдээлж байсан юм. Вакцины хамгаалах урвалыг 80 хувь гэж тооцвол хүн амын 20 хувь буюу 400 мянган хүн өвчлөх эрсдэл одоо ч байгааг гэдгийг тодотголоо. Энэ хэмжээгээр биеийн байдал нь хүндэрч, нас барах эрсдэл нэмэгдэх юм. Сүүлийн нэг хоногт “Covid-19”-ийн нэн хүнд хэлбэрээр 49-89 насны найман хүн нас барсан байна. “Коронавирус”-ийн халдварын шууд шалтгааны улмаас 170 хүн нас бараад байна.

Өнөөдрөөс Улаанбаатар хотын дархлаажуулалтын цэгийг хоёр дахин бууруулж, орон нутагт вакцинжуулалтыг эрчимжүүлж байна. Халдварын тоо буурч, дархлаажуулалтын явц эрчимтэй байгаа хэдий ч халдварын эрсдэл өндөр хэвээр байна. Тухайлбал: 0-17 насны хүүхдүүд вакцинд хамрагдаагүй байгаа нь эрсдэл дагуулж байгаа юм.

Улсын хэмжээнд 1.5 сая хүн “коронавирус”-ийн эсрэг вакцины эхний тун, 622 мянга гаруй хүн хоёр дахь тунг хийлгэжээ. Нийслэлийн иргэдийн 93.9 гаруй хувь нь I тунд, 50 хувь нь хоёр дахь тундаа хамрагдсан үзүүлэлттэй байна.

Вакцины хоёр тунд бүрэн хамрагдсанаас 21 хоногийн дараа тухайн вакцины дархлаа бүрэн тогтож байгаа аж. Иймд иргэд халдвар хамгааллын дэглэмээ сайтар баримталж, олон хүн цугларсан газарт явахгүй байх хэрэгтэйг Эрүүл мэндийн яам санууллаа.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com