Зургаадугаар сарын гурваны өдрийн байдлаар 9045 сорьцод шинжилгээ хийхэд 1024 хүнээс “коронавирус”-ийн халдвар илэрч, улсын хэмжээнд батлагдсан нийт тохиолдол 61 мянга 396 болсон байна.

Шинэ тохиолдлуудын 87 гаруй хувь нь нийслэлд, үлдсэн нь орон нутагт бүртгэгджээ. Сүүлийн нэг сар гаруйн хугацаанд дотоодод 31 мянга гаруй хүн “Covid-19”-ийн халдвар авсныг Эрүүл мэндийн яам мэдээллээ. Хөл хорионы дараа иргэдийн хөдөлгөөн идэвхэжсэн нь халдварын тархалт нэмэгдэх гол шалтгаан болж байгаа аж.

Үүнээс гадна сүүлийн нэг хоногт “Covid-19”-ийн нэн хүнд хэлбэрээр хоёр хүн нас барсан байна. “Коронавирус”-ийн халдварын улмаас 288 хүн буюу нийт батлагдсан тохиолдлын 0.47 хувь нь нас бараад байна.

Харин улсын хэмжээнд нийт 1,860,915 хүн вакцины эхний тунг хийлгэжээ. Нийслэлийн зорилтот бүлгийн иргэдийн 99.9 хувь нь вакцины эхний тунд, 79.7 хувь нь хоёр дахь тунд бүрэн хамрагдсан үзүүлэлттэй байна. Улсын хэмжээнд вакцины бүрэн тунд хамрагдаж, 14 хоноод халдвар авсан 974 иргэн байгааг Эрүүл мэндийн яам мэдээллээ.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com