Сүүлийн 24 цагийн хугацаанд Монгол Улсад “COVID-19”-ийн нэг тохиолдол нэмэгдлээ. Дөрөвдүгээр сарын 18-нд Алтанбулаг боомтоор орж ирсэн тээврийн жолоочийн шинжилгээний хариу “Эерэг” гарсан байна. Ингэснээр дотоодод 34 дэх тохиолдол баталгаажлаа.

Харин түргэвчилсэн оношлуураар “Эерэг” гараад байсан “Интермед” эмнэлгийн сэжигтэй нэг тохиолдлын PCR буюу нарийвчилсан шинжилгээний хариу "Сөрөг" гарсан гэж Эрүүл мэндийн яам мэдээллээ. Түүнчлэн энэ хүнтэй ойр байсан гурван хүний хариу "Сөрөг" гарсан байна.

Үүнээс гадна дөрөвдүгээр сарын 30-нд Сөүл, тавдугаар сарын хоёрны өдөр Франкфурт руу тусгай үүргийн нислэг үйлдэх болсныг Улсын онцгой комисс мэдээллээ. Дээрх хоёр нислэгээр 500 орчим иргэнийг татан авах юм байна. Зорчигчдыг онгоцонд суухаас өмнө 48 цагийн дотор шинжилгээ хийлгүүлсэн байх шаардлага тавьж байгааг мэдээлэлдээ онцоллоо.

Одоогоор 35 улсаас 9412 иргэн тусгай үүргийн нислэгээр ирэх захиалга өгсөн байна. Дараагийн нислэгийн тов гаргахдаа тусгаарлах байр, эмнэлгийн нөөц бололцоог харгалзан үзэж шийдвэрлэнэ гэж Улсын онцгой комисс мэдээллээ.

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com