Хоёрдугаар сарын 18-ны өдрийн 11.00 цагийн байдлаар 49 хүнээс “коронавирус”-ийн халдвар илэрч, улсын хэмжээнд нийт батлагдсан тохиолдол 2493 боллоо.

Лхагва гарагт Халдвартын клиникт эмчлүүлж байсан “коронавирус”-ийн халдвартай нэг иргэн нас барсныг Эрүүл мэндийн яам мэдээллээ. Тухайн өвчтөн ходоод, бүдүүн гэдэсний хожуу үеийн хавдартай байсан ба “коронавирус”-ийн халдварын хүндэвтэр явцтай байжээ.

Үүнээс гадна шинээр батлагдсан тохиолдлуудын 10 нь "Нэг хаалга-Нэг шинжилгээ"-ний хүрээнд авсан сорьцоос илэрчээ. Тус ажлын хүрээнд долоо хоногийн хугацаанд "COVID-19"-ийн халдварын 37 тохиолдол илрүүлээд байна. Энэ пүрэв гарагт Хан-Уул дүүргийн 32 мянга 800 өрхийг шинжилгээнд хамруулна. Тус дүүрэгт халдварын 134 тохиолдол бүргэгдээд байгаа нь нийслэлд бүртгэгдсэн нийт халдварын найман хувь болж байна.

Үүнээс гадна “коронавирус”-ийн эсрэг “AstraZeneca”-ийн вакциныг энэ сарын 22-нд БНЭУ-аас татан авч, 23-наас вакцинжуулалтыг үе шаттай эхлүүлэхээр төлөвлөж байгааг Засгийн газар мэдээллээ. Эхний ээлжид 150 мянган тун вакцин авна. Ингэхдээ МИАТ компанийн шууд нислэгийн зардалд шаардагдах хөрөнгийг Засгийн газрын нөөц сангаас гаргахаар болсон байна.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com