Их Британид шинээр худалдаанд гарч байгаа автомашинуудын хагасаас илүү нь хамгаалалтын автомат технологиор тоноглогдсон байна. "Британийн автомашин үйлдвэрлэгчид худалдаалагчдын нийгэмлэг"-ээс мэдээлснээр шинэ автомашинуудад ослын тормоз, хурдны автомат тохируулга, ослоос сэргийлэх сэрэмжлүүлгийн систем зэрэг технологиудыг түлхүү ашиглах болсон ажээ. Дээрх байгууллагын тооцооллоор 2030 он гэхэд автомат технологийн тусламжтай 25 мянга гаруй ослоос сэргийлж, 2500 гаруй хүний амийг аврах төлөвтэй байна. Одоогоор хамгийн өргөнөөр хэрэглэгддэг хамгаалалтын технологи нь ослын сэрэмжлүүлэг байгаа юм. Уг систем нь хэд хэдэн камер, лазер мэдрэгчийн тусламжтайгаар замд тааралдах бартаа, саадыг тогтоож жолоочид сэрэмжлүүлэг өгдөг аж. 2015 оны судалгаагаар шинээр үйлдвэрлэсэн автомашинуудын 58 орчим хувьд дээрх технологиудаас дор хаяж нэгийг суурилуулсан байна. 2010 онд энэ нь ердөө 6.8 хувьтай байжээ.

Б.Дашням

Холбоо барих: dashnyam.b@bloombergtvmongolia.com

minjma.g@bloombergtvmongolia.com