Төрийн өмчит Эрдэнэс Тавантолгой компани Хятадын Чалко компанид 170 сая гаруй ам.долларын өртэй байгаа болохыг өнөөдөр Уул уурхайн яамнаас танилцууллаа. Эрдэнэс Тавантолгойн үзэж байгаагаар энэ оны гуравдугаар улирлаас тонн нүүрсний үнээр тооцвол 3.6 сая тонн нүүрс нийлүүлснээр Чалкогийн өрийг энэ ондоо багтаан барагдуулах боломжтой аж. Гэвч гуравдугаар улиралд Эрдэнэс Тавантолгой компани тонн нүүрс тутмаа өмнөх улирлынхаас есөн ам. доллараар доогуур буюу 47 ам.доллараар нийлүүлэхээр болсон байна. Үүнээс гадна тендерийн ялагч нь тодорсон Цанхийн баруун хэсгээс 128.6 мянган тонн нүүрс олборлоод байгаа гэж Уул уурхайн яамнаас мэдээлсэн юм. Харин энэ талбайд олборлолт хийхээр болсон Монгол уурхайчид нэгдэлийн хувьд ирэх сараас олборлолтоо эхлүүлнэ гэж мэдээллээд байна. Ийнхүү тендерт ялсан компаниуд олборлолтоо эхэлснээр энэ ондоо багтааж Цанхийн баруун хэсгээс 2.5 сая тонн нүүрс олборлохоор төлөвлөжээ. Харин Цанхийн Зүүн хэсгээс зургаан сая тонн нүүрс олборлохоор төлөвлөсний 834.3 мянгыг нь одоогоор олборлоод байгаа аж. Өөрөөр хэлбэл, он дуусахад таван сар үлдээд байхад Эрдэнэс Тавантолгой энэ жилийн төлөвлөгөөнийхөө дөнгөж 11.3 хувийг биелүүлээд байгаа юм байна.

Э.Нарантунгалаг

Холбоо барих: Narantungalag.e@bloombergtvmongolia.com

Munkhjin.ts@bloombergtvmongolia.com