Хонконг, Нью-Йорк, Лондон, Торонтогийн биржид бүртгэлтэй Монголд үйл ажиллагаа явуулдаг компаниудын хувьцааны үнэ 40-50 хувиар унасан. Харин энэ нь гадаадын хөрөнгө оруулагчдаас Монгол Улсад өгч буй үнэлгээ гэж "Некст Жен" Залуу Мэргэжилтнүүдийн нэгдсэн хөдөлгөөнийнхөн онцолж байна. Түүнчлэн тус хөдөлгөөнийнхөн Ази, Номхон далайн бүсийн хөрөнгийн зах зээлийн хувьцаанууд унасан бол хөрөнгө оруулагчид хөгжиж буй орнуудыг сонирхох хандлага давамгайлж байгааг дурдсан. Үүнээс гадна Олон улсын валютын сангаас хөгжилтэй орны хөрөнгө оруулагчид хөгжиж буй орноос хөрөнгөө татсаар байвал Ази, Номхон далайн бүсийн эдийн засаг цаашид эрсдэлтэй болж магадгүй гэх дүгнэлт гаргасан байна. Харин “Некст Жен” хөдөлгөөний шинжээчид “Хөрөнгийн зах зээлийн энэхүү байдал нь түр зуурынх байх магадлалтай” гэх таамгийг дэвшүүлсэн. Тодруулбал “Некст Жен” хөдөлгөөний зөвлөх бөгөөд “Мандал женерал” даатгал компанийн ерөнхийлөгч Ө.Ганзориг “АНУ-ын эдийн засаг тогтворжиж байгаагаас гадна Европын эдийн засаг уналтаас гарч магадгүй эерэг дүр зураг бий болж байна. Түүнчлэн Хятадын эдийн засаг тооцоолсон хэмжээнээс харьцангуй бага уналттай байгаа нь хөгжиж буй орнуудын эдийн засаг сэргэх хадлага илэрч буйн шинж” гэж ярьсан юм.

Б.Цацралт

Холбоо барих: Tsatsralt.b@bloombergtvmongolia.com