УИХ-аар батлагдсан Хүүхэд харах үйлчилгээний тухай хууль ирэх оноос хэрэгжиж эхэлнэ. Хуулиар хүүхэд харах үйлчилгээг 2-4 насны хүүхдийг эрүүл аюулгүй орчинд асран халамжлах, хамгаалах, хооллох, тоглуулах, амраах үйл ажиллагааг хэлнэ гэж тодорхой зааж өгсөн байна. Харин хүүхэд харагч нь бүрэн дунд болон түүнээс дээш боловсролтой, хүүхэд харах үйлчилгээний тусгай сургалтад хамрагдаж гэрчилгээ авсан, бага насны хүүхэдтэй харилцах арга зүй эзэмшсэн, халдварт болон сэтгэцийн өвчингүй, эрүүл, гэмт хэрэгт холбогдож байгаагүй 18-65 насны Монгол Улсын иргэн байна гэж зааж өгчээ. Мөн хүүхэд харах үйлчилгээ эрхлэх зөвшөөрөл авсан нэг хүүхэд харагчид оногдох хүүхдийн тоо таваас илүүгүй байх, хүүхэд харах үйлчилгээний нэг байранд 15-аас илүүгүй хүүхэд байх ёстой аж. Улсын хэмжээнд 2013 оны байдлаар 2-5 насны гурван хүүхэд тутмын нэг нь сургуулийн өмнөх боловсролын үйлчилгээнд хамрагдаж чадаагүй байна. Бүх хүүхдийг сургуулийн өмнөх боловсролын үйлчилгээнд хамруулах санхүүгийн боломж хомс байгаа тул олон улсад хүлээн зөвшөөрөгдсөн хүүхэд харах үйлчилгээг нэвтрүүлэх замаар энэхүү асуудлыг шийдэх боломжтой гэж хууль санаачлагчид үзэж байгаа аж. Шинэ үйлчилгээ нэвтэрснээр хүүхэд харах 6000 гаруй төв шинээр бий болж, 19 мянган иргэн ажлын байраар хангагдана гэж тооцоолжээ.

Б.Батманлай

Холбоо барих: batmanlai.b@bloombergtvmongolia.com

minjma.g@bloombergtvmongolia.com