Улаанбаатар хотын дарга Э.Бат-Үүл өчигдөр зам засвар, шинэчлэлийн ажил гүйцэтгэж байгаа компаниудын төлөөлөлтэй уулзлаа. Уулзалтын үеэр хотын хэмжээнд 28 байршилд зам барилгын ажил явагдаж байна гэж Нийслэлийн автозамын газраас мэдээлсэн. Энэ онд автозамын ажлын нийт санхүүжилтийн 154 тэрбум төгрөгийг нийслэл болон улсын төсвөөс, 80 тэрбум төгрөгийг Хөгжлийн банкны санхүүжилтээр он дамжин хэрэгжиж буй төслөөс, 15.5 тэрбум төгрөгийг Засвар ашиглалтын сангийн хөрөнгөөс гаргахаар болсон юм. Түүнчлэн нийслэлийн төсвийн хөрөнгө оруулалтаар хийгдсэн автозамын шинэчлэлийн ажил эхнээсээ ашиглалтад орж байгааг холбогдох албанаас онцоллоо. Тодруулбал, Олимпийн гудамжийн 1.1 км автозамыг “Экспресс зам” компани 1.2 тэрбум төгрөгөөр, Дандар баатарын гудамжийн 0.9 км авто замыг “Наранбулаг Хан” компани нэг тэрбум гаруй төгрөгөөр тус тус шинэчилж дууссан байна. Түүнчлэн хотын хэмжээнд зам барилгын ажил гүйцэтгэж буй хаалттай дөрвөн зам байгаагаас гадна Хөгжлийн банкны санхүүжилтээр он дамжин хэрэгжиж буй төслөөс автозамын шинэчлэлийн ажилд төсөвлөгдсөн 2.7 тэрбум төгрөг хүлээгдэж байгаа аж. Мөн Нисэхийн товчоо-Биокомбинат-Шувуун фабрик чиглэлийн 22.5 км авто замын өргөтгөл, шинэчлэлд 30.4 тэрбум төгрөгийг улсын төсвөөс төлөвлөсөн бөгөөд энэ онд тал орчим хувь буюу 15 тэрбум төгрөгийн санхүүжилт олгосон нь хүндрэл учруулж байгаа гэж Нийслэлийн автозамын газраас мэдээллээ.

Б.Цацралт 

 Холбоо барих: tsatsralt.b@bloombergtvmongolia.com