Засгийн газрын ээлжит хуралдаан өнөөдөр болж, хэд хэдэн асуудлыг хэлэлцэн шийдвэрлэлээ. Тухайлбал Улаанбаатар хотыг дахин хөгжүүлэх үйл ажиллагааны хүрээнд “Хотыг дахин хөгжүүлэх тухай” хуулийн төслийг УИХ-д өргөн мэдүүлэхээр тогтжээ. Монгол Улсад 1996 оноос хот байгуулалт болон газрын суурь хуулиуд батлагдсан боловч, хотыг дахин хөгжүүлэх, газрыг шинэчлэн зохион байгуулах асуудал орхигдож, хот суурин газрын агаар, хөрс, усны бохирдол зөвшөөрөгдөх хэмжээнээс хэд дахин их болсон байна. Түүнчлэн Нийслэлд 2000 оноос хойш гэр хороолол ихээхэн тэлж, төлөвлөлтгүй бүсэд 15 гэр хороолол шинээр үүсчээ. Үүний улмаас хот суурины экологи, эдийн засаг, дэд бүтцийн зөв зохистой үйлчилгээг бий болгох боломжгүй болоод байгаа юм. Тиймээс газар ашиглалтын үр өгөөжийг нэмэгдүүлж, хууль эрх зүйн шинэ орчныг бүрдүүлэн хэрэгжүүлэх нэн шаардлагатай байгааг албаныхан онцолж байна. Үүнээс гадна Засгийн газрын ээлжит хуралдаанаар “Гудамж, зам, талбай, үл хөдлөх эд хөрөнгийг хаягжуулах журам”-ыг баталжээ. Журам хэрэгжсэнээр албан ёсны хаягжуулалт хийгдэж, хаягийн мэдээллийн нэгдсэн сан, стандарттай болох юм байна.

Б.Цацралт

Холбоо барих: Tsatsralt.b@bloombergtvmongolia.com