Монгол Улсын хадгаламжийн даатгалын корпораци олон улсын хадгаламжийн даатгалын холбоонд 72 дахь үндсэн гишүүнээр элсэн орлоо. Монгол Улсын Төв банк энэ холбоонд үндсэн бус гишүүний байр сууриар харъяалагдаж байсан бол одоо албан ёсны үндсэн гишүүн болж байна. Өнөөдрийн байдлаар энэхүү олон улсын холбоонд 72 үндсэн гишүүн, 9 холбооны гишүүн, 12 түншлэгч гишүүн улс харъяалагдаж байгаа ажээ. 2013 оны нэгдүгээр сард хадгаламжийн даатгалын тухай хууль батлагдсанаар хадгаламжийг төр 100 хувь даадаг байсан тогтолцоо өөрчлөгдсөн юм. Ингэснээр арилжааны банкууд харилцагчийнхаа өмнөөс хураамж төлж, даатгалд хамруулах үүрэг хүлээх болжээ. Тиймээс хадгаламжийн даатгалын корпораци нь харилцагчийн эрх ашгийг хамгаалахын тулд “Банкны эрсдлийн түвшинг тогтоох аргачлал” -ыг батлуулаад байгаа тухай мөн мэдээллээ. Энэ оны гуравдугаар улирлын эцсийн байдлаар банкны системийн харилцах хадгаламжийн нийт дүн энэ оны эхнээс 27 орчим хувиар өсч, 9.3 их наяд төгрөгт хүрээд байна. Харин нийт хадгаламж эзэмшигчдийн 99 хувь, хадгаламжийн үлдэгдлийн 38 хувь нь 20 хүртэлх сая төгрөгийн хадгаламжид хамаарч байгаа ажээ. Тиймээс хуулийн дагуу нийт хадгаламж эзэмшигчдийн 99 хувь нь бүрэн хамгаалагдсан гэж хадгаламжийн даатгалын корпорациас мэдээлж байна. Тус корпораци наймдугаар сард албан ёсоор үйл ажиллагаа эхлүүлснээс хойш “Банкинд санхүүгийн дэмжлэг үзүүлэх журам”, “Тайлан мэдээ ирүүлэх журам”-ыг батлаад байгаа юм. Энэ хүрээнд "Хадгаламж" банкийг "Төрийн" банкинд нэгтгэсэнтэй холбоотойгоор өөрийн хөрөнгийн дутагдалд нь дэмжлэг үзүүлж сангийн хөрөнгөөс 85 тэрбум төгрөг олгосон байна. Мөн хуулийн хүрээнд актив пассивын зөрүү болох 119.9 тэрбум төгрөгийн санхүүгийн дэмжлэг үзүүлжээ. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com