Энэ оны эхний 11 сарын байдлаар Монгол Улсын уул уурхайн салбар аж үйлдвэрийн салбарын нийт үйлдвэрлэлийн 61 хувь, улсын нэгдсэн төсвийн 19.1 хувийг эзэлж байжээ. Мөн энэ хугацаанд гаргасан экспортын 81 хувь, гадаадын шууд хөрөнгө оруулалтын 73.6 хувийг эзэлж байсан болохыг салбарын яамнаас танилцуулсан байна. Өөрөөр хэлбэл энэ жил уул уурхайн салбараас эдийн засагт үзүүлэх нөлөөлөл нь үл ялиг багассан байна. Ялангуяа уул уурхайн салбарын орлогод жин дардаг нүүрсний олборлолт 12 дугаар сарыг оруулан тооцохгүйгээр 28.6 сая тонн байснаас 15.9 сая тонныг нь экспортолсон бөгөөд Монгол Улсын төсөвт 241 тэрбум төгрөг төвлөрүүлсэн байна. Энэ нь төлөвлөж байсан орлогын 58.9 хувьтай тэнцэж байгаа ажээ. Нүүрсний экспортын орлого ийнхүү төлөвлөж байсанд хүрээгүй нь энэ оны эхний улиралд нүүрсний үнэ огцом унасантай холбоотой юм. Учир нь компаниуд алдагдал хүлээхгүйн тулд нүүрсээ экспортлолгүйгээр нөхцөл байдлыг ажиглаж байсан гэж тайлбарлаж байна. Үүнээс гадна энэ оны эхний 11 сард Монгол Улсын хэмжээнд 712 мянган тонн зэсийн баяжмал үйлдвэрлэжээ. Зэс олборлогч “Эрдэнэт”, “Оюу толгой” зэрэг компаниудаас улсын төсөвт төвлөрүүлэх татварын орлогын гүйцэтгэл нь 11 сарын байдлаар 82 хувийн биелэлттэй байсан аж. Түүнчлэн энэ онд Монгол Улсын алт, газрын тосны олборлолт, экспортын хэмжээ нэмэгдсэн жил болж байна. Алтны олборлолт сүүлийн гурван жилд байгаагүй хэмжээндээ буюу 7.6 тоннд хүрч, татварын орлого бүрдүүлэлт 173.2 хувьд хүрчээ. Харин газрын тосны хувьд 4.8 сая баррель түүхий тос үйлдвэрлэсэн байна. Ер нь уул уурхайн гол бүтээгдэхүүний экспортыг хоёр дахин нэмэгдүүлэх бодлого баримталж байгааг Уул уурхайн яамнаас мэдээлж байна. 

Э. Нарантунгалаг 

Холбоо барих: narantungalag.e@bloombergtvmongolia.com 

minjma.g@bloombergtvmongolia.com