Усны суурь хураамж тооцох аргачлалыг Хот суурины ус хангамж, ариутгах татуургын ашиглалт, үйлчилгээг зохицуулах зөвлөлөөс боловсруулан батлуулсан байна. Судалгаагаар нийслэл, томоохон хотуудын айл өрхөд усны суурь хураамж нь 4142.8 төгрөг байхаар тооцоо гарчээ. Гэхдээ эхний ээлжинд хүн амд аль болох бага нөлөө үзүүлэхээр тооцоолж 2000-3000 төгрөг, бусад аймгийн төв, суурин газарт 1000-1800 төгрөг байхаар тооцож байгаа гэж зохицуулах зөвлөлийн Үнэ, тарифын албаны дарга Ж.Гэрэлчулуун ярилаа. Усны суурь хураамжийг зөвхөн төвлөрсөн системд холбогдсон орон сууцны айл өрх болон албан байгууллага, аж ахуйн нэгжээс авах бөгөөд гэр хорооллын усны үйлчилгээний үнэд ямар нэгэн өөрчлөлт гарахгүй аж. Усны суурь хураамжтай болсноор ямар үр дүнд хүрэх талаар зохицуулах зөвлөлийн Үнэ, тарифын албаны дарга Ж.Гэрэлчулуунаас тодруулахад “Үйлчилгээний чанар сайжирч, усны алдагдлыг бууруулан, хэрэглэгчдийг 24 цагийн турш чанартай усаар хангах нөхцөл бүрдэнэ. Аж ахуйн нэгж, албан байгууллагуудад шугамын голч, усны хэрэглээнээс нь хамаарч суурь хураамжийг ялгавартай тогтооно. Гэхдээ суурь хураамжийг яг хэзээнээс хэрэгжүүлж эхлэхийг шийдээгүй байгаа. Холбогдох байгууллагуудаас санал авч байна” гэсэн юм.

Б.Цацралт

Холбоо барих: Tsatsralt.b@bloombergtvmongolia.com