Монгол Улсын хивсний машинт үйлдвэрийн анхдагч болох "Улаанбаатар хивс" компани өнгөрсөн онд нэг тэрбум 474 сая төгрөгийн хивс, хивсэнцрийг борлуулж, 29.7 сая төгрөгийн ашигтай ажиллажээ. Харин 2013 оны эцэст 104.9 сая төгрөгийн цэвэр ашигтай ажилласан байна. Учир нь тус компани зарим эзэмшлээ түрээсэлснээр 338.8 сая төгрөгийн орлого олсон бол 50.1 сая төгрөгийг гадаад валютын ханшийн зөрүүнээс олсон байна. Нийт зургаан тэрбум төгрөгийн зах зээлийн үнэлгээтэй “Улаанбаатар хивс” компани зах зээлд 404 мянга 829 ширхэг энгийн хувьцааг гаргажээ. Санхүүгийн жилийн эцэст эдгээр хувьцааны нэгж бүрт ногдох жилийн өгөөж 259 төгрөг байгаа аж. Харин нэгж хувьцааны ханш нь өнөөдрийн байдлаар 15 мянган төгрөг байгаа нь бүртгэлтэй компаниудаас өндөрт орж байгаа юм. “Улаанбаатар хивс” компани Хөрөнгийн биржид бүртгэлтэй “Арилжаа” импексийн хувьцааны дийлэнх буюу 68 хувийг эзэмшдэг. Хувьцаагаа арилжих эрх нь дахин сэргэсэн “Арилжаа” импекс компанийн 68 орчим хувийг эзэмшдэг “Улаанбаатар хивс” компанийн зүгээс үлдсэн 32 хувийн эзэмшигчдийн хувьцааг худалдан авах тендер саналыг 2013 онд гаргаад байна.  “Улаанбаатар хивс” компани “Арилжаа” импексийн нэгж хувьцааг 200 төгрөгөөс доошгүй үнээр худалдан авах ажээ. Тендер саналыг гүйцэлдүүлэх хугацаа 2013 оны 12 дугаар сарын 19-нөөс эхэлсэн бол энэ өдрөөс хойш 60 хоног байхаар заасан байна. Ийнхүү тус компани Хөрөнгийн бирж дээрх нэгдэн нийлэх ажиллагаанд оролцож байгаа компаниудын нэг боллоо.“Улаанбаатар хивс” үйлдвэр анх 1971 онд байгуулагдаж, 1992 онд хувьчлагдан өнөөдрийг хүртэл 40 жил тасралтгүй үйл ажиллагаагаа явуулж байгаа юм. 

М.Дэлгэрмаа 

Холбоо барих: delgermaa.m@bloombergtvmongolia.com 

minjma.g@bloombergtvmongolia.com