УИХ-ын чуулганы өнөөдрийн нэгдсэн хуралдаанаар Эдийн засгийн хөгжлийн сайд болон Сангийн сайд нарыг огцруулах асуудлыг хэлэлцэх гэж байна. Өнгөрсөн долоо хоногт энэ асуудлыг эдийн засгийн болон төсвийн байнгын хороод хэлэлцэж, сайд нарыг огцруулахыг дэмжихгүй гэж шийдвэрлээд байсан юм. УИХ дахь МАН-ын бүлгээс хэлж байгаа үндэслэлээр, сүүлийн нэг жил таван сарын хугацаанд Засгийн газар үр бүтээлтэй ажиллаж чадаагүй. Үүнээс шалтгаалан Монгол Улсын эдийн засаг их хэмжээгээр доройтсон гэж тайлбарлаж байна. УИХ дахь МАН-ын бүлэг “Гадаадын хөрөнгө оруулалт 2013 онд хоёр дахин буурсан нь Эдийн засгийн хөгжлийн сайдын үйл ажиллагаатай шууд холбоотой. Мөн “Чингис” бондыг цаг хугацааг нь тооцолгүйгээр гаргаж, Монгол Улсын өрийн хэмжээг нэмэгдүүлснээс гадна, их хэмжээний хүү төлөхөд хүргэсэн зэрэг нь Эдийн засгийн хөгжлийн сайд Н. Батбаярыг огцруулах үндэслэл” гэж мэдэгдээд байна. Харин Сангийн сайдын хувьд төсвийн орлого бүрдүүлэлт, хөрөнгө оруулалт, төгрөгийн ханшийн огцом сулрал зэрэг асуудлуудад цаг тухайд нь бодит үнэлэлт өгч чадаагүй, “Чингис” бондын хөрөнгийг улсын төсөвт суулгахгүйгээр бүрдүүлсэн мөн "2013 оны төсвийн орлогын төлөвлөгөөг бүрэн биелүүлэхэд бүхий л нөөц, бололцоогоо дайчлан, төлөвлөгөөний зорилтыг нэр, төрөл бүрээр нь хангаж биелүүлэх ажлыг шуурхай, оновчтой зохион байгуулах" гэснийг ханган ажиллаж чадаагүй гэж үзэж байгаа ажээ. 

Б.Дуламхорлоо

Холбоо барих: dulamkhorloo.b@bloombergtvmongolia.com 

minjma.g@bloombergtvmongolia.com