УИХ-ын чуулганы нэгдсэн хуралдааныг хоёр өдрөөр хойшлуулахаар боллоо. Энэ долоо хоногийн УИХ-ын чуулганы нэгдсэн хуралдаанаар Хилийн боомтуудын тухай хуулийн төсөл, Хөгжлийн бодлого төлөвлөлтийг боловсронгуй болгох, Хотыг дахин хөгжүүлэх тухай зэрэг эдийн засгийн чухал ач холбогдолтой 14 асуудлыг хэлэлцэх ёстой байв. Өнөөдрийн хуралдаанд УИХ-ын гишүүдийн хурууны хээ уншуулдаг системийг ашигласан бөгөөд зарим гишүүдийн микрофон ажиллахаа больж, санал хураалтын явцад буруу зөрүү санал гарлаа гэсэн үүднээс УИХ дахь МАН-ын бүлэг чуулганы хуралдаанаас завсарлага авлаа. Харин үдээс хойш УИХ-ын Тамгын газраас мэдэгдэл хийж "МАН-ын бүлгийн тавьсан шалтгаан арилсан учраас чуулганы хуралдааныг 14 цагаас эхлүүлэх боломжтой" болохыг илэрхийлсэн ч УИХ-ын чуулган өнөөдөр хуралдсангүй. Харин маргааш хуралдах эсэх нь тодорхойгүй байна. Ардчилсан намын зүгээс чуулганы хуралдааныг "....энэ мэт асуудлаас болж завсарлуулж байгаа нь шалтгаан биш" үргэлжлүүлэн хуралдах ёстой гэсэн байр сууриа илэрхийлж байгаа юм. Харин сөрөг хүчин болох МАН-аас "Парламентыг тараах асуудлыг хөндөж магадгүй" байгаа аж. Энэ хооронд Монголын ногоон нам, Монголын бүгд найрамдах нам тэргүүтэй долоон нам Сангийн сайд болон Эдийн Засгийн Хөгжлийн сайдыг огцруулах тухай мэдэгдэл гаргаад байна. Энэ лхагва гарагийн УИХ-ын Байнгын хороодын хуралдаанд оролцсон гишүүдийн ихэнх нь Н.Батбаяр, Ч.Улаан нарыг огцруулах асуудлыг хэлэлцээд дэмжээгүй юм.

Э.Нарантунгалаг 

Холбоо барих: narantungalag.e@bloombergtvmongolia.com 

minjma.g@bloombergtvmongolia.com