УИХ-ын чуулганаар Төрийн болон орон нутгийн өмчийн оролцоотой хуулийн этгээд шинээр үүсгэн байгуулах, тэдгээрийн ТУЗ, засаглал, үйл ажиллагааны хамрах хүрээ зэрэг олон талын асуудлыг хамарсан хуулийн төслийг хэлэлцэхээр дэмжлээ.

2021 оны гүйцэтгэлээр Төрийн болон орон нутгийн оролцоотой аж ахуйн нэгжүүд 1.3 их наяд төгрөгийн татвар, хураамж төвлөрүүлсэн нь улсын төсвийн 16.3 хувьтай тэнцэж байна. Үүний дийлэнх хэсгийг “Эрдэнэт үйлдвэр” ТӨҮГ, “Эрдэнэс Тавантолгой” ХХК дангаараа бүрдүүлжээ.

Хууль санаачлагчийн онцолж буйгаар Төрийн өмчит компаниудын зардал улсын төсөвт төвлөрүүлэх орлогоос давж, үр ашиггүй ажиллаж, хувийн хэвшилтэй зах зээл булаацалдсан хэрэг болж байгаа аж.

Тиймээс хууль зүйн туслалцааны тухай хуулийн шинэчилсэн найруулгын төсөлд эдийн засгийн тооцоогүйгээр төр хүссэн салбартаа компани үүсгэн байгуулах боломжийг хязгаарласан гэж Хууль зүй, Дотоод хэргийн сайд Х.Нямбаатар онцолж байна.

Тухайлбал: стратегийн ач холбогдолтой салбарын жагсаалтыг дөрвөн жил тутам УИХ, нийтийн дэд бүтэц, нийтийн үйлчилгээний тодорхой салбарын жагсаалтыг Засгийн газар батлах, ТУЗ-ийн гишүүдийг томилох, чөлөөлөх, эрх үүрэг, нөхөн олговор зэрэг асуудлыг тусгажээ.

УИХ-ын гишүүн Г.Тэмүүлэн

ХЗДХЯ-ны Төрийн нарийн бичгийн дарга П.Сайнбаяр

УИХ-ын гишүүн Б.Энхбаяр

2021 оны гүйцэтгэлээр “Эрдэнэт үйлдвэр” ТӨҮГ 3.1 их наяд төгрөгийн орлого олсноос 901 тэрбум төгрөг нь цэвэр ашиг, “Эрдэнэс-Монгол” ХХК 1.5 их наяд төгрөгийн орлого, 126 тэрбум төгрөгийн цэвэр ашигтай ажилласан байна. Мөн “Монголросцветмет” ТӨҮГ 85 тэрбум төгрөгийн ашигтай, “Улаанбаатар төмөр зам” ХНН 69 тэрбум төгрөг, Төрийн банк 45 тэрбум төгрөгийн ашигтай ажиллажээ.

Хэдий тийм боловч Төрийн болон орон нутгийн оролцоотой аж ахуйн нэгжийн нийт өрийн үлдэгдэл 18 их наяд төгрөгөөр хэмжигдэж байгаа бөгөөд эдгээрийг төлүүлэх чиглэлээр судалж байгаа гэж Хууль зүйн яам мэдээллээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com