Ерөнхийлөгчийн сонгуулийн урьдчилсан дүнгээр Монгол Ардын намаас нэр дэвшигч У.Хүрэлсүх авсан саналынхаа тоогоор тэргүүлээд байна.

Нийт хэсгийн хороодын 99.7 хувьд санал тоолох машинаар тоолсон дүнг нэгтгээд байгаа аж. Нэгтгэсэн мэдээллээс харахад Монгол Ардын намаас нэр дэвшигч У.Хүрэлсүх 68 хувийн саналтайгаар илт давуу ялахаар байна. Өөрөөр хэлбэл саналын үлдсэн дүнг эсрэг талд тооцсон ч У.Хүрэлсүхийн дүн өөрчлөгдөхөөргүй байгаа юм.

Саналын нэгтгэлийг урьдчилсан байдлаар танилцуулснаар У.Хүрэлсүх өөрийн ялалтыг урьдчилан зарлаад байна. Мэдэгдэлдээ "Иргэд маань намайг илүү ихийг бүтээж, эхэлсэн ажлаа дуусгаасай гэсний үүднээс сонголоо гэж ойлгож байгаа" хэмээн мэдэгдсэн юм.

Харин “Зөв ХҮН Электорат” эвслээс нэр дэвшигчийн сонгуулийн штабаас "Цаашид улс төрийн тавцанд эрх баригч намын эсрэг сөрөг хүчин болж, улс төрд тэнцвэр бий болгохын төлөө ажиллана" гэдгээ мэдэгдлээ. Мөн сонгуулийн зардалд 1.2 тэрбум төгрөг зарцуулсны 90 хувь нь хандив байсныг онцлов.

Түүнчлэн “Зөв ХҮН Электорат” эвслээс нэр дэвшигч Д.Энхбат сонгуулийн үр дүнг хүлээн зөвшөөрч байгаагаа өөрийн “Twitter” хуудсанд жиргэжээ. Тэрбээр "Бид энэ сонгуульд гэрэл гэгээ, шинэ өнгө авчирч чадсандаа баяртай байна. Сайн цаг өөрөө ирдэггүй, түүнийг авчирдаг гэдэгт итгэж бид зүтгэсэн" гэж мэдэгдэв.

Харин Ардчилсан намаас нэр дэвшигч С.Эрдэнийн Сонгуулийн штабаас сонгуулийн системд шинэчлэл хийж, бусад ардчиллыг дэмжигч намуудтай нэгдэх шаардлагатай гэж мэдэгдлээ. Тэрбээр жиргээндээ "Асар их луйврын хар хүчний эсрэг хүчин мөхсөдсөн ч үзэл санаандаа үнэнч үлдэж чадсандаа бахархах ёстой" гэж дурдсан байна.

Энэ удаагийн сонгууль өмнөх сонгуулиудтай харьцуулахад хамгийн бага ирцтэй сонгууль боллоо. Нөгөө талаас сонгуулийн ялагч хамгийн өндөр хувьтай саналаар ялсан тохиолдол болж байгаа юм.

Сонгуулиар бүх саналыг гараар тоолж баталгаажуулна. Сонгуулийн ерөнхий хорооноос 15.00 цагт мэдээлэл хийнэ.

Ж.Зоригт | @TeraReader

Холбоо барих: zorigt.j@bloombergtvmongolia.com

minjma.g@bloombergtvmongolia.com